ما في بيت يخلى من المشاكل

انا متزوجه من 6 سنين وعندي بنت ، انا وزوجي نفس الاعمار 28 الحين تزوحته عن طريق الاهل يعني مو حب عادي اول ما تزوجنا كانت حياتنا كلها مشاكل بسبب علاقاته مع بنات بس الحلو اللي فيه انه يكلم وحده واذا هدها او طحت عليه يكلم غيرها يعني مو نفس البنت ، حملت بعد ما تزوجت ب5 شهور خارج الرحم وسويت عمليه والحمد الله الاخ الذكي على باله اني ما اييب عيال وراح سوا فحص من كيفه انه ما فيه شي وانه اوكي قلت له انا حملت يعني ما فيني شي جان يقول شوفي نفسج طبعا باستهزاء قلت حق امي الله يخليها ودتني عند فوزية القطان طلع فيني الغده بس عالجتها بشهر جان احمل ويبت بنتي طبعا قبل لا احمل المشاكل تزيد من كل النواحي ودايما اهلي اللي يدخلون لدرجه وصلت لي الطلاق حتى وانا حامل مشاكل لدرجه انه يخنقني ،

كثرت المشاكل مع العلم اني تخرجت من المعهد وقاعده بالبيت لانه ما يبيني احتك بالناس وخاصه عزايم البنات ويشيشوني عليه خايف من هالشي وما اسوق سيارة هو اللي يوديني وييبني لا وبعد مو كل مرة امي تاخذني لشغلي حتى الصالون قريب يم البيت بس يقولي دقي على اهلج ياخذونج ، والله يا بنات انه مصروفي حالي حال بنتي يعطيني بس 100 دينار الله يخليكم هالمبلغ يكفي بوقتنا هذا !! والله ان ابوي يعطيني نفس مصروفي قبل الزواج واكثر وامي اذا قاصرني شي تشتريلي اياه وانا قاعده بيت حمولتي يعني لازم البس واكشخ لهم اشوف حريم حمواني كلهم يلبسون يديد وانا الدراعه تقعد علي بالاشهر اذا مو بالسنه
وعلشان تكونون بالصورة كل ما اطيح عليه يكلم هو يجيك من وراي الخط مالي باسمه يشوفني اكلم لي علاقه مع شباب وجذي يعني يشك فيني

كذا مرة يطقني واخر مرة طقني قبل سنتين اللي خليته يحلف انه ما يمد ايده علي مرة ثانيه تدرون ليش؟لانه طبلت اذني تعورني ما اسمع عدل سمعي صار ثقيل وراسي بين فترة وفترة يصدع يوم قلت له كل منك حلف انه ما يمد ايده ومن بعدها تغير صج انه على خرابيطه بس من فترة لي فترة ، قلت بيني وبين نفسي خله هو ما رده بيمل دامه جذيه ،من بعدها قلت ما ابي ادخل اهلي بكل صغيره وكبيرة لازم اتعود اني اتفاهم معاه لان الاهل مو دايمين لنا الله يحفظهم

اذا تهاوشنا والله ما اخليه يطلع الا وهو راضي عني قمت اقفل الباب ما يطلع واذا طلع ادق عليه واتفاهم معاه عودته على جذي من كثرهم صار فيني سكر والحمد الله على كل شي ، المهم قالي سجلي بالهيكله علشان يمشيلج معاش استانست واذا نزلي اعطيه لانه ينزلي قبل معاشه ونكون حدنا تحت الصفر واذا نزل معاشه يعوضني تغير وايد اسلوبه وطريقه كلامه ما قام يكلم الا بالسنه مرة

بس هالسنه مصخها شراله لاب توب هو دوامه شفتات فياخذه اذا صار دوامه ويسهر فيه من ضيقه الخلق هناك ،
عاد قالي سويلي ايميل وابي رقم سري سهل الحبيب ما يعرف شي عن الكمبيوتر الا يدش مواقع بس ، عاد انا اجيك من وراه اشوف منو اللي ضايف والا انصدم بنات اكثر من الربعه لا ومن دول العالم شرق وغرب انا استخفيت المشكله صووووووووووووووووووووووووووووووووووووررررررررررررر ررررررررررررررررررررررررررررر وكلام يكش البدن لمن واجته قالي ربعي يضيفون بنات لان ما عندهم ايميل قلت مو ذنبي انت تبي المشاكل لا تعطيهم جهازك وسكر ايميلك ، مرت اشهر وانا اجيك من فترة لي فترة ، اخر مرة قبل جم يوم كان داش ايميله وقلت له المواقع التعارف اللي تدشهم رجاء لا تدخل فيهم عن المشاكل قالي اشدراج قلت اللي بايميلك يوم بطله جان يقولي واشمعنا فلانه ما شفتيها قلتله منو والا طلعت وحده قلتله شنو كاتبه قالي ولا شي وطلع عن الصفحه وتهاوشت معاه جان اخذ الوصله الانترنت واكسرها بس ما اخترب مصيبه تدرون شنو سوى خذ اللاب توب مالي اللي ابوي شاريلي اياه وكسره انا انهرت وارتفع الفولت عندي اللي قمت اقط حجي ما ادري عنه بس قوي وجايد ما تخيل اني اكلمه بهالطريقه قلتله انت تبي تخسرني علشان بنت الشوارع طبعا الكلمه بمعنى ثاني انت كل يوم عند ربعك علشان تكلمهم ومن هالحجي جان يقولي ليش قاعده معاي روحي بيت اهلج قلتله (لو علي انا ما قعدت معاك دقيقه بس قلبي المخدي يبيك وشاريك طيح الله حظي ) هو طخ سكت قام يفكر كان كلامي اقوى من جذي ما اقدر اكتبه لكم بس اول مرة يشوفني منهارة جذي

طلع ما يدري شنو بيقول طلع عقبها 3 دقايق دق علي وقالي انتي شنو بتوصلين له قلتله انت اللي تبيه راح يصير قالي الحين اييج يوم دش والله انا ابجي جان يحب راسي ويقولي اسف مو قصدي وراح اعوضج بلاب توب غيره وقلت له راح اخذلك وصله يديده وكلمه منه وكلمه مني لي ما تراضينا

قلت له انا اغار عليك واذا انا مقصره معاك كلمني لا الزوجه ولا حتى الزوج يرضى انه له علاقه مع شخص ثاني غيره قالي خلاص هاذي اخر مرة وماراح تكرر لا بالنت ولا بره

حبيباتي

انا كتبت قصتي بالمختصر يمكن مو مفهوم عدل بس انتوا خواتي الكبار والصغار انا امي تعبت وما ابي ازيدها هم، اهله طبعا لو بيدخلون بتقوله لا تسوي جذي انت مسؤول عن بيت والخ يعني لو شنو ما يبردون قلبي بشي

ابي ردودكم في غلط مني والا طريقتي صح لاني تعبت المفروض الواحد اللي يغلط ما يكرر غلطه صح والا لا بس هو يكرر ويكرر