مرّ من يم السواد إحساس هالصمت ويتـوب

يمرّ .. من يم السواد .. إحساس هالصمت .. ويتـوب
يلفظ من أنفاس .. القلق .. سطرين حلم .. ويسمعـه
ياخي .. ولا أدري .. هنا .. وشلون هاليابس يـذوب
الصدر .. ضيّق من هموم الوقت .. والشعر .. السّعـه
حرفين .. والثالث بصق .. في وجه هالدفتر .. ذنـوب
عجزت مشاريه السما .. لا طـشّ .. صمتـه تجمعـه
متفائل .. ومال الطريق .. بهقوتي مـن كـل صـوب
لا صك باب المغفره .. مخلوق !! .. ربّي .. شرّعـه
يالله .. مدري وش يحد الطيب .. عن بيض الـدروب
غير اليباس إللـي لـه .. بوسـط الحنايـا .. قرقعـه
يا وجد حالي .. كل ماهبـت مـن الغربـي .. هبـوب
وجد العزيز إللي .. رفسه الفقر .. والجـوع صرعـه
على طريقٍ .. حـد درب خطـاي .. عنـوه للجنـوب
وأنا شمّالـي لا وطـت رجليـه .. قفـرٍ .. تزرعـه
مدري .. ولكنّ السهر يبني منامي .. طوب .. طـوب
مدري ولكن الحيـا .. هـو راس مـال .. الزعزعـه
أزريت .. أسولف للورق .. عن حلم .. آفل للغـروب
ينام في فرش الصحو .. بُرهـه .. وحاولـت أمنعـه
صرخت في وجه الضما .. والماي .. بشفاهي يـروب
وأنتجت .. من وصل الشعر .. بالصمت .. لحظه مُمتعه
أدري .. يساور هالزهر .. يمناي لدغة .. كـل نـوب
وأدري بعد .. هالصبح يرميني .. حروف .. بمطلعـه
ما جيت .. غير إني أنا الغالب .. وهالشعـر مغلـوب
وما رحت غير إن الحصى .. ردد قصيدي .. وأبدعـه
علمني الحنكه .. وأنا علمتـه .. يخـوض الحـروب
وعلمته الفكره .. وهو علمنـي .. شلـون .. أقطعـه
ماهي وداعاً .. دام ما للغـدر .. سلطـه .. بالقلـوب
والمجلس إللي .. أرتاح به .. قلبي .. فأنا ما أودّعـه
يمر .. من يم القلق .. حلـم المسافـر .. مـا يتـوب
ويوقف .. ولا ياخذ نفس .. يمكن جنونـه .. يقنعـه
يالله .. وفق خطوه المحتـار .. فـي عـوج الـدروب
وفك اليباس إللـي لـه .. بوسـط الحنايـا .. قرقعـه