مشكلة اصواااات البطن المحرجه

وصلت لدرجة فكرت اني اقدم استقالتي
ووصلت لدرجة اني فكرت ارفض أي ترقية تجيني، لان الترقية معناها الاجتماعات مكثفة مع المسؤولين الكبار وانا اخاف من مواجهتهم واستحي والسبب (أصوات البطن)

بصراحة جربت اغلب العلاجات، واكتشفت انه مافيه حل سحري لهذي المشكلة، لأن أساسها التوتر النفسي،

فمثلاً طلع صوت من بطنج في مكان محدد وحسيتي انج بتموتين من الاحراج، خلاص يصير ارتباط في مخج ان في هذا المكان لالالالالالازم تطلع أصوات من بطني، ولذلك تحسين بتوتر اذا صار اجتماع ثاني بنفس هذا المكان

بينما لاحظي ان الاصوات هذي ما تطلع لما تكونين في البيت ومع أهلك، حتى لو كان المكان هدووووووووووووء وحتى لو كلتي أثقل الاكلات،
ما تطلع الا لما تكونين في مكان عمل والجو هادئ، اذا فكرتي فيها تلقين ان السبب نفسي بالدرجة الاولى ولازم تعالجين الموضوع من هذي الناحية

اكتشفت ان العلاج الوحيد هو (الثقة بالنفس) حاولي تكون ثقتك في نفسك كبيرة، ولو طلعت الاصوات لا تديرين لها بال أبداً،

ما تتخيلين انا شكر حاسة فيج،

أنا الاصوات اللي تطلع من بطني أصوات غازات في البطن مش أصوات الجوع والمعدة، تخيلي المأساة والاحراج آآآآآآآآآآآآآآه،

أدعي الله وايد انه يشافيني من هذي الحالة، والحمد لله أحس اني احسن الحين، صرت ما اهتم، واعطي لنفسي ثقة كبيرة، لان مرة حضرت اجتماع مدته نص ساعة تقريباً وماطلعت اصوات وايد، فخليت هذا الشي حافز لي واقول حق نفسي: شفتي شلون لان انتي واثقة من نفسك ما طلعت الاصوات

ومرة سمعت في برنامج تلفزيوني مشكلة وحدة انها تتوتر لما يناديها مديرها، قال لها المعالج لا تنتظرين هو يناديج، انتي روحي للمدير بين فترة وفترة وعودي نفسك على أجواء مكتبه، علشان لما يناديك تكون نفسيتك مهيئة لانك متعودة على المكان.

كرري على نفسك عبارة (so what) يعني حتى لو طلعت الاصوات، شبيصير في الدنيا؟؟؟؟؟؟؟؟؟؟

فوزية الدريع مرة تكلمت عن موضوع ما اذكر شنو بالضبط بس استفدت من كلامها شغلة انك لما تكونين خايفة من الشي لازم تقطين نفسك فيه، يعني لما تكونين خايفة مثلاً من الاماكن المرتفعة، عالجي نفسك بأنك تتعمدين انك تروحين هالاماكن، ولو خايفة من الطيارة مثلاً سافري وحطي نفسك في الموقف، وبتشوفين ان ما صار شي فيك، وبتقتنعين من داخلك ان الخوف هذا وهم مو أكثر

اكرر في بالي وايد هذي الفكرة: الاجتماع فترة قصيرة وبينتهي، ليش ادخل في اكتئاب علشان هالسبب التافه جداً

ولما احضر الاجتماع احاول قدر استطاعتي اني اركز في الكلام اللي ينقال، واتناسى بطني، واتناسى الخوف والتوتر لان ان توترتي طلعت الاصوات،

بمعنى أصح خلج ريلاكس