مطلقة شنو استفدتي من تجربتج و شنو اللي بتتجنبينه بزواجج الثاني ؟؟

السلام عليكم

انا ودي اطرح هالموضوع و حتى المتزوجات ممكن يفيدوني فيه
انا متطلقه من فتره و كان وقتها عمري 20 سنه
و كنت ماعرف شي بالزواج

صج انه الغلط اغلبه من زوجي طلع نصاب الله حسيبه
بس هم فيه امور حسيت انه انا غلطانه فيها

يعني اهم شي تعلمته من الزواج

انه اسرار بيتي ماتطلع لاحد لو شنووووو

مشاكلنا تنحل بينا و بين بعض فقط

الغلطة اللي سويتها كنت اصرف عليه مع الاسف مع اني كنت ما اشتغل بس ساعات ابوي يعطيني بالخش و كنت اجمع من مصروفي اللي يعطيني اياه زوجي و يرجع ياخذه

بس بدايتها كان يطلع من البيت و شوي و لا واصلني مسج من البنك انه مسحوب مبلغ مني
و لما اساله يقولي اي انا اخذته و كنت اسكت لما وصلنا لمرحلة
ادفع اغلب الاشياء و هذا راح اتجنبه

كان يجذب و يطلب مني تضحيات كثيره و بدون مقابل يعني لما الزوجه تتنازل او تضحي لاي شي بحياتها لازم الزوج يقدر هذا الشي لكن للاسف انا سكت لما حسيت نفسي رخيصه و هذا اكبر غلط تسويه الزوجه

الشي الاهم اني كنت اداري على غلطاته و اطوفها حتى لو على حساب كرامتي

اهله كنت ما احط لهم حد و كل شي عادي لما وصلوا لمرحلة انا قاعده بالصالة و اشوف اغراضي و اكسسواراتي عليهم و بكل وقاحه كانوا يدخلون غرفتي ياخذون اغراضي وحماتي كانت ماخذه ولد عمها و بنفس الوقت هم جيرانا يعني بيوتهم يم بعض كانت كله عندنا و مره من المرات تسولف لي تقولي قميصج من وين ماخذته التركواز اللي فيه دانتيل اقولها شدراج عنه تقولي اخذته لبسته , تخيلوا يا بنات مالي اي خصوصية و كل اغراضي عندهم و ياويلي اذا قفلت باب غرفتي
انا اطالع مستغربة و هم و لا همهم حسبي الله و نعم الوكيل اخر شي صاروا مع ولدهم

اللي الحمدلله الله عداني اياه و ماتدبست قالي اول ماتتوظفين بناخذ قرض عشان نشتري بيت و انا صدقت و مره سولفت جدام ابوي و ابوي زفني قالي ديريبالج تروحين معاه

و الاهم يا بنات الاهل الاهل الاهل انا غلطت كنت اقوله كل مشاكلنا ببيت اهلي و يوم تهاوشنا عايرني فيها كلها

و الله يا بنات لاتلوموني بحكم صغر سني و عدم خبرتي بالحياة طحت بكل هالغلطات و الحمدلله الحين تعلمت و هذي اهم الاشياء اللي تعلمتها من تجربتي و اقول ربي لك الحمد اني طلعت منه بدون اولاد و لا حملت و لا شي

و الحين الحمدلله ربي عوضني بانسان ثاني بعد رمضان زواجنا باذن الله

ابي مشاركاتكم و تعليقاتكم
بس بليز مابي ردود قاسية و تجريحات لان صج قلبي معورني من اللي صار بس انا كتب لكم هالكلام عشان كل وحده تتجنب هالغلطات اللي طحت فيها
و اذا فيه وحده اكبر مني اعتبرها اخت او ام كبيره و تبي تنصحني او تنبهني على شغله اعتبروني اختكم و الله لا يحرمني منكم