موظفه و ام و تأنيب الضمير تعالي ابيج

الموضوع حق الموظفات بالاخص

راح اكتب تجربتي و اتمنى تشاركوني علشان الاستفاده

تأنيب الضمير

مافي وحده موظفه و عندها بيبي و او عيال بالعموم الا تحس بتانيب الضمير و انها مقصره بحق ولدها او بنتها و مو قاعده تعطيهم حقهم من حب و اهتمام و طباخ الخ……
انا لما توظفت كان ولدي الكبير عمره سنه و نص و الصغير 4 شهور من غير مبالغه كنت كل يوم ابجي بطريج الدوام قلبي معورني ليش امخليتهم مع ان مع ابوهم و جدتهم بس احس اهم يبوني انا مو اي احد ثاني و ظلت هذي معاناتي لحد بيوم ولد الصغير ماكل وايد علووج و وديته الطبيبه و قلت لها انا بالدوام ل 4 و بهالفتره ما ادري شنو يصير معاه و بديت ابجي والله مو غشمره ( على بالي دكتور نفسي )

الدكتوره كانت وايد حنونه و هاديه الله يوفقها قالتلي اوعي تحسي بتانيب الضمير لانج تاركتهم و رايحه الشغل انت بتشتغلي ليه ؟ مش عشانهم ؟
بصراحه كلامها عادي بس ماادري ليش صحاني و خلاني اراجع نفسي

انا رديت حق الوظيفه علشانهم 95% و 5% علشاني علشان المصداقيه
و بعدين مو مهم شكثر اقعد بالبيت المهم شكثر اقضي وقت مفيد معاهم يعني

وايد امهات ما يشتغلون بس ما يجابلون عيالهم الا قليل يا نايمين يا طالعين يا تلفزيون يالنت …. على الاقل انا قاعده اقضي 7 ساعات بعيده عنهم بس شي مفيد لهم و لي

و بعدين المهم نوعيه الوقت الي اقضيه معاهم مو كميته

و بصراحه لما راجعت حساباتي بديت اتقبل الوضع و ارتب يومي

اليهال ينامون لغاية ساعه 10 او 11 الصبح يقومون يتريقون و يقعدون يلعبون و بطالعون تلفزيون لما ارجع و من ارجع يصير وقتي كله تحت امرهم حتى اذا تعبانه و بنام انسدح بالصاله و اخليهم يلعبون حواليني فديت ازعاجهم

و بصراحه طلعاتي الاجتماعيه ( يمعات رفيجات ,مطاعم ,استقبالات ) صارت شبه معدومه معدا المناسبات المهمه طبعا افضل اقضي وقتي مع اعيالي ابرك او اخذهم معاي بالاماكن الي احس ان عادي وجودهم مو اخذهم عروس و ولاده و ازعج الناس

و عودت ريلي ان طلعتنى ما تكمل الا مع اليهال مو معناته ما نطلع بروحنا بس اغلب الطلعات ناخذهم معانا و بدون خادمه اريح لنا حتى الجمعيه و لان ريلي تعود على ازعاجهم ووجودهم معانا بكل شي الحين اذا طلعنا بروحنا يتحلطم طول الطلعه ان مكان اليهال مبين و طلعه حلاتها معاهم

اقتنعت ان الخادمه وجودها ضروري للام الموظفه وتشيل عنها حمل كبير بس اهم شي الرقابه المستمره و عدم ثقه الكامله فيها او طبعا الاعتماد الكلي عليها يعني اذا سافرت ما احس ان ضايعه بدونها لا وجودها مكمل بغيابي بساعات الدوام

و ما اكذب عليكم انا مو سوبر ومان يعني ما اقدر اداوم ل 4 و بعدين ارجع اغسل الملابس و انظف البيت و اطبخ الغدا و اصلا شرعا هذي مو وظيفة الزوجه ( الطبخ و التنظيف ) طبعا مستحب بس مو فرض و انا بمعاشي حطيت لي خادمه ثانيه حق شغل البيت علشان اجابل ريلي و عيالي هال 50 دينار معاش الخادمه ممكن تنصرف بنص ساعه بالسوق على لاقل اعطيهم معاش حق خادمه و اشتري طاقتي ووقتي

من اهم الاشياء بالنسبه لي وقت النوم لازم اكون موجوده بالبيت البسهم و اغسل اسنانهم و ادخلهم الفراش بعد القصه و البوسه و لازم اقولهم انا شكثر احبهم باليوم 20 مره مهم وايد ان تقولين لولدج او بنتج انت تحبينه علشان يحس بالامان و بالحب وايد امهات تمر شهور من غير ما تطلع منهم كلمه احبك حق عيالها و مهما كان العمر شهر او 18 سنه قولي لهم انج تحبينهم لا تعتبرين هالشي مفروغ منه و اهم يدرون

و بصراحه انا دايم اقول حق ولدي الكبير عمره 3 سنوات ونص ان اروح الدوام علشانه و علشان اوديه السكول الحلوه و نسافر ديزني لاند ( على قد تفكيره افهمه ) و اهوه قام يتقبل سالفه الدوام و ما يبجي لما اروح و ينطرني لما ارجع و اول سؤال شنو يبتيلي هديه

نصيحه يابنات الدعاء الدعاء ( دعوة الام ) دايم ادعي ربج يسخر لهم الي يحن عليهم و يحفظهم بحضورج و غيابج

و انا بصراحه ما اروح الدوام قبل ما امسح عليهم و اقول استودعكم بودائع الله التي لا تضيع و صج احس بالامان و الراحه ان مخليتهم تحت عين الرحمن يرعاهم

بالنسبه للاكل ما اعتمد نهائيا انهم شنو كلو و انا بالدوام و بس ارجع احاول اوكلهم كانهم ما كلو شي بغيابي

بس ارجع احطلي و احط لهم الغدى و نتغدى مع بعض

و بعد ساعه اعطيهم فوااكه اي نوع مو مهم المهم فواكه

و بعد ساعه اعطيهم حليب كامل الدسم مع العسل

و ساعه 9 نتعشى و ساعه 10 تقريبا حليب مره ثانيه قبل النوم ساعه 10 ونص

بالنسبه للحلويات احاول بس ما اقدر اسوي فل كنترول لان في بيت حمولتي يعني كل ما نزلو اصعدو بكاكاو او حلاوه

بس الممنوع منعا تام
البيبسي و مشتقاته و البفك و البطاط و الوجبات السريعه ( معدا يوم واحد بالاسبوع اذا طلعتهم )

و الحين صارلي سنيتن و نص موظفه و الحياة تمشي و الله يطرح فيهم البركه يارب و يحميهم و يبعد عنهم كل سوء