مو متحملة الحالة اللي انا فيها

صباح الخير

شلونكم بنات

يايتلي حالة ما ادري شنو اهي بالضبط وليش ؟؟
صارلي يمكن اسبوع احس مو طايقة نفسي
على طول منقمت قلبي حتى اني الصبح اقوم من النوم مثل الهم قاعد على قلبي

الأعصاب صايرة شي مو طبيعي وايد عصبية مع اليهال
زوجي مو متحملته
لدرجة ساعات بناتي يكلموني او زوجي احس مو متحملة اسمع صوت اي احد فيهم ولا لي طاقة او مزاج حتى اتكلم معاهم والله امس بنتي تسلطت علي بالأسئلة سؤال ورا سؤال سؤال ورا سؤال سؤال ورا سؤال اسم الله عليها
جان اصرخ بس سكتي
اكسرت خاطري بس صايرة اعصابي فايرة بشكل مو طبيعي حتى اهلي اللي طول اليوم اكلمهم بالتلفون امي تدق علي تقولي شفيج ما تدقين مثل قبل ؟؟؟

والله ما ادري شنو فيني والله

انا الحين حامل بالشهر السادس وهذا مو اول حمل لي
حملي الاول والثاني ما يت لي هالحالة ابهالقوة
صايرة على طول اطالع جسمي ومتنرفزة من شكلي ووزني خاصة اني حملت وانا قاعده اسوي رجيم وكنت حيل ضعفانة قمت كله تلوع جبدي الحين من جسمي
واحاتي وايد الطلق لان نوعي اقعد يوم اذا مو اكثر وانا اطلق
يعني ساعات فجأة ابجي
زوجي يقولي شفيج ؟؟؟؟
اقول له تذكرت الطلق ووضعي بوقت النفاس

يمكن تحسون اني مكبرة الموضوع
بس والله انا نفسي مو عارفة شنو اللي صاير معاي
هل اهو من الحمل
هرمونات
محاتاة الولادة وزيادة مسؤولية اليهال
او لاني توني من اسبوعين تقريبا يايبة خدامة يديدة وللحين قاعده اعلمها شغلها

ما ادري احس مو طايقة شي
لدرجة امس قلت له ودي احجز غرفة بفندق بروحي مابي احد ابي اريح نفسي من كل مسؤولية ابي اقعد بروحي منزعجة من كل شي
صايرة من اتضايق اقول الله ياخذني

ما ادري شفيني
ما ادري
ادري تكلمت وايد بس حسيت اني مو قادرة اوقف حسيت ابي بس اتكلم واطلع اللي فيني