نور المسااء بعد غيبتك الطويلة !!!

يا قاطع الوصل قلي وش سبب هالجفا
حقي عليك انشدك واتحقق السالفه
وذا لسان ابن عمك في مقامك هفى
الواجب انك تبيح الظلم يا كاشفه
ماودي افتح سجلات الغلا والوفا
أكيد تعرف من اللي قلبك ايوالفه
يومن نجمك مع البدر المنير احتفى
أخذتني للهوا بعيونك الخاطفه
عشنا يتاما ومتنا فالغرام اشرفا
من عادنا أغراب وقلوب ألوفا حالفه
نور المساء بعد غيبتك الطويله طفى
طفى ولا شفت وجهاً لنظر يألفه
ونا ليامن طيفك زارني واختفى
تضيق في عيني الدنيا وهي وارفه
الجفن من سبتك ياهاجري ماغفى
شوفتك بلسم وبعدك عبوةٍ ناسفه
فتحت لك باب صدري قلت لي ما كفى
زود الدلع مال غصنه منك يا عاكفه
لا تعصر الجرح جرح اللي هوا ماشفى
خذني بعطفك وقلبي يا غلا لا طفه
وضعي كما الشام مع بشارها مؤسفى
ماعد ينفع تهد الطير وتهاتفه

عندي من اجروحك المتعطشات اكتفى
ولا زلت تنشد متى هي وقعة الراجفه
وصفت لك حالتي وارجاك كن منصفى
لا تتلف القلب فوق أعصابي التالفه
حبيبك الأمس جاك اليوم متأسفى
وإهداك روحه وقدم لك رقم هاتفه
وان كان خاطرك من صوبي بعد ما صفى
يمديك تهدم حصون الحب بالقاصفه
لكن علمي بك انك للمحاني دفى
يغلبك قلبك وتتحكم بك العاطفه
انا تربيت في حبك زمن مترفى
واليوم يا غايتي تلعب بي العاصفه