هالانسانة مأزمتني شاسوي معاها ؟

مرت حماي وبنفس الوقت تصير لي .. اكبر مني ب11 سنة ، دايما تطلعني بصورة شينة عند الناس وخصوصا عند حمولتي واهل ريلي ، يعني مثلا اذا صار عندي ظرف او ماييت مناسبة تقول حق الناس ان انا كلا جذي ما ايي ولا اقدر احد ..
ودايما تقولي اسوي اشياء عشان خالتي ام ريلي تستانس مني ، بعد فترة طويله اكتشفت ان هالاشياء اللي اسويها تزعل خالتي ، ودايما تقول اني ماعرف البس وماعندي ذوق وماعرف شي ولا ادل محلات وان ابوي صاك علي .. الخ (( اللي مايعرفني ويشوفني يصدق هالحجي لاني من ناحية دراستي احس ان وضعي سيء وخايفه انفصل اذا ماشديت على عمري من جذي قاطة كل شي ورا ظهري لما اخلص السنة اللي آنا فيها وويهي مبين عليه التعب )) واذا كشخت بالعطله على بالهم ان مرت حماي اهي اللي علمتني الكشخه والا آنا ماعرف شي .. المشكلة ان حمولتي يصدقون لانها متشيحطه عليهم وااااايد

المشكلة اني تزوجت وآنا ادرس ، ودراستي صعبة شوي يعني لازم اصك على عمري عشان انجح .. واهي ماخذتها فرصة تشوه سمعتي عند الناس ، يعني بهالفترة آنا ماعندي وقت حق نفسي ولا عندي وقت حق العروس والمناسبات لاني ضاغطة على عمري عشان اتخرج .

الحين احس ان اهل ريلي خذوا عني فكرة بايخه ، وخالتي على بالها اني مافهم شي ولا اعرف شي وآنا ماعندي الوقت الكافي اني اثبت لهم العكس ، حتى الزواره موقاعدة ازور لاني اييب مدرسين بالويك اند
وفوق هذا يوم صارت عندي عطلة وفضيت حق عمري شوي وقمت اكشخ قالت حق حماتي ترا آنا اللي علمتها والا اهي ماتعرف شي من جذي قامت تكشخ (حماتي طيبة زل لسانها وقالت لي هالحجي ) آنا عقب ماسمعت هالحجي كرهت مرت حماي اللي تصير لي وحسيت اني غبية .

وتذكرتها في ملجتي شلون خسبقت ملجتي ، وكانت تدق علي تقول لي لاتشترين شي غالي ترا اهل ريلج مايعرفون شي ومايحبون الغالي خلج عادية ، آنا من ثوالتي صدقتها قمت اسمع كلامها ومن تقول لي على محلات رخيصة وبوطقة رحت اجهز منها ، واذا رحت حق حمولتي البس الرخيص والغالي اخليه حق ريلي (( صدق من قال الطيبة الزايده ثوااالة))

الحين الناس خذت عني فكرة اني اي شي وماعرف البس وابوي صاك علي ((مادري من وين يايبينها)) .. واني ماروح حق احد ولا اقدر احد وكلا حاكرة عمري ((آنا متوهقة بدراستي والله يعلم بحالي)) على ان مرت حماي اللي تصير لي تدري ان اهلي مدلليني حييل وامي ماتلبسنا الا من احسن المحلات واغلاها ، وكانت تبجي لما تشوف امي ملبسة اختي الكبيرة ملابس كشخه واهي امها تلبسها من سوق واجف على كلام اختي بس الغيرة سبايب ، الله ينتقم منها ..

والمشكلة الثانية ان الناس مالها الا الظاهر ، يعني اهي اول ماتزوجت كانت توها متخرجه من معهد وقاضبة معاشها ومتشيحطه على حمولتي لين قالت بس ، وآنا يوم تزوجت أجلت حفلتي بسبتها لين تزوجت على الفاينل حتى بالعرس موقادرة اضحك عدل من كثر ماكنت احاتي امتحاناتي ، وخذيت بنصايحها من ناحيت لبس وطلعت بصورة بايخه حييل ، فوق هاذا قاعدة تشوة صورتي وتجذب في كل شي ، حتى عمرها تجذب فيه تقول ان اهي اكبر مني ب6 سنوات واهي اكبر مني ب11 سنه ، وكل ماشافت شي عندي تسوي روحها ان اهي اللي معلمتني اياه ، عند الناس تتكلم معاي عن محلات وجذي عشان اللي يسمعها يعتقد ان اهي اللي تعلمني وتوجهني ، وآنا خلف الله علي ماعرف اتصرف .. شنو الحل معاها ، احقرها والله يبين كل شي ، والا ارد عليها وازفها وافشلها ، والا انطر متى اتخرج واتبت العكس للكل واحقرها وماعطيها ويه ، والا شسوي بالضبط ؟؟

الله يخليكم ابي ردودكم ، احنا بالكويت كل شي عندنا مظاهر ، وآنا من هالناحية مرت حماي مسويتني بيزه ماسوى عند حمولتي ، الكل ينظرلي نظرة بايخه واحس فيهم مستهينين فيني وايد ، مادري ليش ، سااااااااااعدوني