وزارة البطيخ بحاجة إلى إصـــلاح

السلام عليكم

فيه قضية خطيرة انا ملاحظتها هالسنة

يمكن كل سنة احنا نسمع ونشوف تسريب امتحانات قبل الامتحان بيوم وغش بس من تحت لي تحت

بس هالسنة الوضع غير .. صار الغش على المكشوف

انا مدرسة ابتدائي فعطلنا مبجر .. الصبح الساعة 11 تدق علي رفيجتي مستعجله تقولي تكفين برسل لج فقرة انجليزيه ترجميها .. قلت اوكي بسيطة ترسل الفقرة واترجمها وارسلها لها

بنفس اليوم ادق عليها شنو سالفة هالفقرة .. قالت لا اخوي عنده امتحان انجليزي وصور لي فقرة الترجمة وانا ارسلت له الجواب .. كل هذا وقت الامتحان بالبي بي

تكنلوجيا

وحده من اهلنا تقول انا شايله عن ولدي البي بي قبل الامتحانات عشان يدرس ووقت الامتحانات يوم درت انه توصلهم الاجابات بالبي بي تقول رجعت له تلفونه ورجعنا الخدمة لانها مقطوعه تقول لولا التلفون والله ما ينجح .. ولدها نسبته 85 وبيدش الجامعة

انا ماقول هالكلام حسد للطلبة .. بس اللي قاعد يصير مصيبة شنو مخرجات التعليم اللي تبي تطلع لنا من هالاشكال .. الاهالي مستانسين يبون عيالهم بس يجيبون نسبة مو مهم فاشل او فهم ولا مافهم المهم يحصل شهادة ويدخل الجامعة ..

هذي كارثة والله .. وتدرون الكارثة الأكبر شنو

لو تطبق اقتراح المليفي عن البونص وانه يتم تقييم المعلم بناء على درجات طلبته .. فيها اخر السنة 8 الاف دينار .. بيصير الغش صج على اصوله

ياناس اللي قاعد يصير حرام مو هذا مستوى التعليم اللي نطمح له ولا هذي المخرجات بتنفع مجتمعنا

منا للمسئولين بوزارة التربية .. الفساد بالتربية والله ماتشيله جبال .. انا مدرسه واشوف الوضع يعور القلب .. لا تقولون ماكو غش الغش موجود والكل يدري لا المدرسين ولا اللي فوقهم .. وفيه تساهل كبير مع الطلبة وفيه توجه انه يمشون كثر ما يقدرون ويتساهلون بالنتايج والنسب عشان يغطون على فشل المناهج

انا قلت هالكلام من حالات واجد حوالينا من اهلنا وجيرانا ومعارفنا .. الغش هالسنة غير كل سنة والوضع كل ماله يتردى .. وبعد بيزيد السنين الجاية اذا ماصار فيه تدقيق ووقفة جادة من الوزارة لضعاف النفوس من الطلبة والمدرسين