تخطى إلى المحتوى
الرئيسية » ولدي للحين مايبي الحضانه وانا مليت =(

ولدي للحين مايبي الحضانه وانا مليت =(

بسم الله الرحمان الرحيمو الصلاة و السلام على أشرف المرسليننبينا محمد صلى الله عليه وسلم


الســـــــــــــــــلام

بنات

أنا أكثر من مره حطيت موضوع بخصوص ولدي والحضانه ..

ألحين اهو عمره سنتين وشهر .. وصارلي تقريبا من عمره سنه ونص وانا بديت اوديه الحضانه ووديته 3 حضانات كل وحده اقعد فيها يوم او يومين ويبجي بعدين امل وارده البيت .. بس الحين صار سنتين وقلت هذا عمر الحضانه يعني غصبن عليه يدش .. طبعا بتقولولي ليش مستعيله تدخلينه مو غصب .. انا يا بنات مالي حظ مع الخدم يا وحده ماتبي ياهل ولا وحده تطلع مو زينة ولها سوالف وامي مره كبيرة ما تتحمل ولدي فتره طويلة واهو اسمله عليه شيطااان وانا متأخره بالجامعه ولازم اخلص .. فالحل الانسب حق ولدي اهو الحضانه ..

وديته الاحد الي طاف حضانه واول يوم كنت معاه قلت ماراح اداوم بقعد عنده وقعدنا ساعتين وكان مستانس ويلعب طبعا لان شايفني موجوده .. ثاني وثالت يوم وديته متأخر على الساعه 10 ودخلته عندهم الغرفه جان امشي يقعد يبجي حيل بعدين يسكت .. اليوم الصبح بوديه ولما وصلنا شاف الباب جان يبجي مارضى اشيله ولا قدرت اشيله ادخله داخل يبجي من قلب مايبي يقول اخاف وألحين شسوي يا بنات خلاص انسى سالفة الحضانه ولا احاول باجر بعد ..
انا مجبورة ادخله لان ماعندي احد احطه عنده والله مليت يا بنات منو جذي عانت مع ولدها على مادش الحضانه وانا اصلن هالحضانه مو مرتاحتلها ماحب حضانه فيها هنديات والمشكلة الحضانات القريبه كلهم مسكرين .. اخاف انهم قاعدين يأذونه لان مالهم خلق ياهال يبجون ويدد

ساعدوني

الوسوم:

10 أفكار بشأن “ولدي للحين مايبي الحضانه وانا مليت =(”

  2. chichaki
    الرد

    هلا وغلا حبيبتي ام حمد ..

    والله حتى انا بدخله حضانه وللحين مادخلته هالايام ان شاء الله ..
    عمر ولدي سنه و8 شهور وخدامته بتسافر ..

    الصراحه لازم تشجعينه كل يوم تقولينله اوديك الالعاب اوديك البحر
    وعلى شوي شوي بيتعود .. والله يعينج ياقلبي ويعيني ..

  3. kamiliya
    الرد

    عندنا وعندج خير امس فضحني فضيحه كبرى بالحضانه ولا راضي يدخل ولا يقعد وصراخ موطبيعي والمشكله ماكو ولا دمعه بس بعد عيني تعب من الصراخ وطلعته وكلمتهم قتلهم اليوم بجرب اذا ما قعد بكنسل خلاص

  5. salima
    الرد
    ياربي شنو الحل معاهم انا بعد ولدي جذيه مع انه الحضانه الحين نادي صيفي ويونسون كل يوم والله مسوين لهم نشاط واشياء اهو يحبها سباحه وسينما ورحلات كل اسبوع بس من الاسبوع اللي طاف كل يوم يبجي مايبي يروح مادري شسوي معاه وبصراحه اهو صاير لايطاق انا طول اليوم وياه صراخ ارتاح شوي بسلامته لاراح ماخليت شي ماسويته اشتري له هدايا اقوله هذي من الحضانه وهذا عشانك رحت بعد ماكوفايده

  6. kouka
    الرد
    ^^^

    نفس حالتي والله .. طول اليوم بس اصرخ عليه .. ولما قعد جم يوم يروح الحضانه اسمله عليه اكون حيل مرتاحه ارد البيت ارتب على راحتي بعدين اروح الدوام ..

    الله يحفظهم ويعينا على تربيتهم ..

  7. مريم
    الرد
    انا ابله روضة

    الياهل يبجي تقريبا لي اول خمس ايام وبعض اليهال يطولون
    بس يتعود

    وغلطتين انتو تسوونهم تخرب الياهل ماتعدله

    1 تقعدون معاهم وايد بالحضانه .. اوكى اول يوم علما يتأقلم ويتعرف على المكان ممكن بس خلاص كافي
    2 لمه يبجي وايد ويصرخ تطلعونهم

    اول شي وديه مكان ثقه مو أي مكان .. بعدين انتي خلج شجاعه عشان اهوا يتشجع وعادي الياهل يبجي ومرده بيسكت كل عيال الناس جذي محد فيهم مابجى

  8. madiha
    الرد
    بدعتوا انتوا جذي تخربونه
    انا جذي اول ما اوديه يبجي بجيييي و انا اطلع بسرعه عشان ما يفكر ان اخذه و من ورى الصف اسمعه بعدها يسكت بشوي

    و ساعات قبل لا يدش المبنى يلمني حيييل يدري ان راح اخليه اهناك

    و ساعات يشوف المدرسه تناديه عشان تاخذه يبجي شوي ويسكت وانا عمر ولدي توه سنه بس انا بغربه لا اهل ولا صديقات ولا خدامه
    لازم ما تسوون جذي لان بيدري ان البجييي اثر فيكم
    سوو مثلي وديه وطلعي مرده بيسكت و يتعود لان مكاان حلوووو يلعبون و يهال ف اكيد دلع مو اكثر

  9. chahinez
    الرد
    الله يعينج ويعيني
    انا وديته 3 حضانات اغله وحده فيهم رضه يقعد فيها قلنا ماعليه تستاهل
    واستانست اقطه واطلع اخلص شغلي اذا نزلنا يبجي شوي ياخذونه انطر اذا سكت طلعت
    وكل شوي ادق يقولون مافيه شي

    ثالث يوم اهم ماقدرو عليه فضحهم دقو قالو تعالي مو راضي يسكت خذيته من بعدها اذا شاف الحضانه يتنحر بسياره مايرضه ينزل
    بس ان تسببت على نفسي قام يخاف والله تكرمون الحمام مايخلين ادش الا اهو معاي كله يحسبني بروح مكان وبخليه باليل ينام بفراشه بس يستوعب اني مو عنده يقوم وايني ينام بفراشي واييييييييييد تعبت معاه من عقب الحضانه وانا ولدي عمره سنه و11شهر
    قلت بدخله عشان يصير اجتماعي ويشوف الياهل ويتعلم جم شغله وابي يتكلم مو راضي يتكلم بس يخربط بالحجي

  10. madiha
    الرد
    انا بنتي اسمله عليها وديتها حضانه معرفي الي بالسالميه رووووووووعه حتى كانت تحب الستاف الي هناك بعدين بطلو فرع ببيان فنقلتها
    كانت تحب الحضانه بس العام وديتها الروضه (الباكستانيه)
    طبعا كل يوم بجي وماتبي تروح حتى بالعطله كل ساعه تسالني باجر في سكول ولا لا
    اخر شي طلعت ابلتهم الباكستانيه اطقها على راسها وظهرها ليش انشالله؟
    اتقول علشان شيطانه وبالحصه كله تقعد تلعب

    فديرو بالكم يمكن احد بالحضانه يطقهم المدرسات او حتى اليهال الي معاهم

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

هذا الموقع يستخدم Akismet للحدّ من التعليقات المزعجة والغير مرغوبة. تعرّف على كيفية معالجة بيانات تعليقك.