ياخوات مرت حماي تتمشى بالصالة بقميص النوووووم !!!

السلام عليكم …

أنا مشكلتي مع مرت حماي عويصة ….
ماراح اطول عليكم بس مدري من وين ابدأ ؟؟؟؟

اولا نظام بيتنا شقتين قبال بعض شقة لي وشقة لحماي وبالنص غرفة خالتي

المهــــــم ان مرت حماي ماخذه راحتها حيييل بالبيت علمــًـا باننا محافظين حييل ومنقبات وحتى بالبيت مانكشف قبال اخوان الزوج ولازم نلبس شالات تغطي الجسم المهم محافظين وفينا وااجد بالعيلة دينين , بس مرت حماي تعدت الحدود السالفة ومافيها وقت النهار او اذا قعدت من النوم المغرب وتبي تدرس عيالها تطلع من غرفة النوم على بيجامتها او الشورت وتتمشى بالصالة (( الصالة اللي اقصدها الصالة اللي بين الشقتين مو صالة شقتها )) تطلع بالصالة وتنادي ولدها وتطلع تنادي الخدامة ولا تروح لخالتي وتسولف وياها شوي طبعا بالشورت او البيجامة المفصخة تقريبا وتعشي عيالها مرات بالصالة اللي بين الشقتين وهي لابسة هاللبس وهذا غير اذا جت حزة الليل لبست قميص النوم وتقعد تتمشى بصالتها او تنوم عيالها والباب على كبره مفتوح والبيبان ملوت شققنا كباار الباب الواحد متر ونص امبيه انا انصدم من الموقف لا والثلاجة برا الشقة عند الباب تطلع تبي شيء من الثلاجة بقميص النوم او الشورت واذا اذا تسترت تلبس روب مفتوح والى الركب ووهذا غير انها تجي بكل جراءة وتمشي الى نهاية الصالة تروح عند الدرج وتحاجي خدامتها ولا تنطر خدامتها تجيب لها شي من تحت وهي واقفة بقميص النووم
ومرة كانت مادري شلابسة المهم شبة متفصخة وكانت منشغلة بولدها مادري شفية المهم كانت واقفة يم بابي بالضبط وانا كنت بفتح باب الشقة جان تصكرة حيل اخترعت وقلت شفيها هاذي فتحت الباب مره ثانية جان تصكره حيل واتله جان افتح الباب والا هي قبالي وإلا تقول اووه عبالي فلان ( زوجي) ((( عبالها زوجي وماتبية بيطل الباب لين تروح من الحيا طيب ليش تطلعين بهالمنظر واقفة عند باب شقتي بهالمنظر )))

أسكت ولا اكمل اخاف انفجر ….

لا والوقاااحة اني لما اعزمها في شقتي تجيني لابسه قميص نوم وفوقة روب طويل يعني متسترة علما ان الروب مفتوح والشعر طالع والوجه وكل شيء واضح ومرات تجيني يكون زوجي نايم عادي اشكرة تجي بهاللبس ومرات يكون زوجي طالع واذا جاء زوجي تقول روحي قوليلة يدش ابطلع يعني شوفوا وين وصلت ولا اذا تبي مني شيء تطق الباب وهذا شكلها طيب فرضا زوجي فتح الباب هذي مو حاله …

وهذا غير لما تنزل تحت واهي لابسة قميص النوم والروب المفتوح وطولة الى الركب وغير لما تكون طالعة من الحمام وماخذه شور تنزل تحت لافة الفوطة على شعرها ولابسة روب الحمام أمبييييه راح تتعبون وانا ماخلصت

وغيره وغيره وغيره

في المقابل انا قمة في الستر واستحي حيل خالتي لما تطق باب شقتي والله كنت ما افتحلها الباب وانا لابسة بيجامة حتى لو البجامة مستورة كنت اذا احد طق الباب علطول البس الدراعة فوق البيجامة والحين صرت البس بيجامة قدام خالتي والبيجامة ماتكون فتحة الصدر كبيرة او الكتوف كلها طالعه او شورت … اما اذا كنت لابسة قميص نوم وطقت الباب دايركت البس اي دراعة خفيفة احس اذا شافتني لابسة الروب ومسكرة الروب راح تدري اني لابسة قميص نوم واهي النقيض تماما حتى لو بجيب ولدي من الصالة اللي برا يعني بسرعة ما اطلع بالبيجامة بس اذا ابي انادي الخدامة يعني بس بطلع راسي عادي بالبيجامة يعني متحشمة حييل وخالتي دايم تشهدلي من هالناحية وتمدح أحس انها نغزه حقها بس ماهمها ..

علاقتي فيها : مرت سنتين وانا علاقتي فيها حييل زينة واشوف هالمناظر ومو قادرة اقولها شيء او افشلها لين مر علي موقف الى الان انا مصدومة منه فتحت باب شقتي والا اهيا شقووول شبة مفصخ وواقفة بين شقتها وبين غرفة خالتي وتنادي الخدامة انا انصدمت قطيت جم كلمة صدمتها فيها وجيتها بعد جم ساعة واعتذرت وجبتها من الناحية الدينية والاخلاقية بعيد عن زوجي وقالت عيالي وخدامتي عادي يشوفوني معودتهم وخالتي شاسوي مجبورة اطلع جبالها يكون عندي شغل بالصالة ومالي خلق البس قلتلها لا مو زين وحرام وانتي بصراحة صدمتيني ماتوقعتج بهالجرأة ومن هالسوالف لين اقتنعت ولما جاء من باجر باليل والى نفس اللبس ولما جت عيني بعينها ولا كان شي صااار عادي طوفت وعلى هالحال لين ماقدرت اتحمل ما انلام وحده طالعة نازلة مفصخة قبال زوجي وقلت حق خالتي قالت حق ولدها ان مرتك لبسها مو زين ولا فااااد وبعدها بجم شهر مسكتها وقلتلها لبسج مو عاجبني بالعربي مابيج طالعة نازلة مفصخة قبال زوجي سكتت احرجتها واستحت حييل وبدأت تحتشم وقعدت 3 اشهر مضبوطة بس صارلها لاجم يوم رادة مثل اول شاسوي ؟؟؟

علما بان علاقتي معاها من شهرين مو شيء صارت سوالف خلتني ابتعد عنها يعني ما تهاوشنا بس تروح تقول لخالتي شيء وتقولي شيء لين انكشفت قبالنا وابتعدت عنها وصرت ما اعزمها بشقتي مثل اول ولا اسولف وياها الا قليل ..

وزوجي احسن مافية انه مايدش البيت الى وهو طاق الباب او يعطيهم خبر انه يبي يدش مو مثل زوجها يدرعم علينا حتى شقتي مايطلع منها الى واهم معطيهم خبر انه يبي يطلع لانه داري انها مو محتشمة وراح يلقاها متفصخة …

ألحين وانا اكتب الموضوع سمعت صوتها برا طليت والا لابسه بيجامه وقاضة الشعر ولابس روب قصير علما بان زوجي هذي حزة جيتة !!!!

مادري شاسوي كلمتها كلمت خالتي كلمت حمياتي وعطوا زوجها خبر ولا فاااد شنو الحل ؟؟