يامتزوجات عيب استحوا على ويهكم حراام عيب لايجووز . شنو مات الحيا فيكم؟؟

طبعا انا ماكتب موضوع مثل هذا الا واااصل العدااااد عندي مليووون ولم يوووصل حده وينفجر افجر نفسي بموضوع هني واطلع حرتي

الحين كذا موضوع ينطرح بقسم الحياة الزوجية ومنها موضوع كتبته انا بنفسي وصار انقلاب ومظاهرات صكت على مظاهرات مصر وتونس …المهم…ومثل ماقول بكل مواضيعي انا احبكم كلكم وموشرط الموضوع يقصد عضوة معينة بس من حقنا نتكلم باللي مايعجبنا دام بحدود الاحترام ودام انه وجهة نظر بس بالمنطق والعقل

ادش الموضوع اقراه القاه يونس وحلو واخر موضوع قريته من شوي عنوانه تقريبا ان شنو شعوورج بعد الدخلة صراحة موضوع ايونس ويهبل واشكر صاحبته عليه…

اللي يقهرني ويفجر مرارتي لم القى بين الردوود وحدة ترز ويهها وتقووول يابنات عيب ترى فيه مراهقات ترى فيه بنات هالحجي ماينقال هني عييب انزين سؤااااااااااااال صريح وواضح وكبر رااسي اذا القسم اسمه قسم الحيااة الزوجية واللي اهوا المتنفس الوحيد للمتزوجات يكتبون مواضيعهم ويتناقشوون ويبحثون بكل الاموور الخااااااااااااصة بالزواج والعلاقة الزوجية بكل ماتتضمنها نتعلم نفيد ونستفيد اذا كل هذا مانكتبه هني عشان العذر السخييييييييييييف ترى عيب في بنات مو متزوجات!!!!!!

اول شي حاابه ارد على اصحاب هالفكر اللي يسمحوولي اقول عنه فكر عبيط ليش؟؟؟ اقولج ليش…

اولا لان هذا قسم زوجية ويفترض محد يدش فيه غير المتزوجات فمالنا ذنب ان في بناات قعد يدشوون وهالشي ما المفرووض يوقف عائق جدامنا لان غير هالقسم مافيه قسم نتكلم فيه عن الزواج بكل مافيه..يعني شننو تبون نتكلم هني عن الطبخ؟؟ في قسم للطبخ عن المكياج في قسم مكياج هني قسم متخصص بشكل تاام عن الزواااااااااج يعني للمتزوجات يناقشون علاقاتهم زعلهم قهرهم يطلبون نصايح يعرضوون تجاارب ممكن تكون مواضيع جريئة بس مانوضعت الا للافادة وبس شكووو حراام وشكوو مايجووز وشكوو ترة لاتتكلمون فيه بنات!!!!!!!!

ثانيا البنات اللي يدشوون ماتوقع يعني في وحدة اقل من 18 سنة يعني ما مرت علي بنت بالابتدائي ولا بالمتوسط اصغر بنات الحين نشوفهم بالثانوي وهالجيل هذا اسم الله عليهم يقحصوون علينا بمعلووماتهم وبمخهم المفتوووح يعني اذا تبين شي اهما يعلموونج مو انتي تعلمينهم ومالنا اي سلطة ان نمنعهم من الدخوول واذا بنطبق كلامكم ونقول عيب ترى في بناات عيل يتسكر القسم احسن ولا نصبغ بيض !!! ولا ندش نسلم على بعض ونطلع مو احسن؟!!

ثالث شي المواضيع بالاغلب قعد تنطرح حلوة وخفيفةبعضها جدي وبعضها للفرفشة والمشكلة اشوف ردوودكم المعارضة دائما في مواضيع من احلى ما يطرح يعني اعتراضج كلش ماله دااعي ..الحرام بالحديث عن تفاصيل علاقتي الزوجية وهم الحديث لمجرد اللغوة والقرقة اما لو انا عرضت تجربتي ولا شلون ادلع ريلي عشان الكل يستفيد فهذا مو حرام ليش ما اخلي البات يستفيدون مني بطريقة معاملتي للريال ولا انصحهم شنو تلبسينله ولا شلوون تدلعينه ولا اي موضوع خاص بالزواج وين المشكلة؟؟ هذا القسم او المنتدى بشكل عام انوضع للمعرفة عشان نتعلم عشان نستفيد لو مانعرضت تجارب من وين بنستفيد؟؟؟

اتمنى اصحاب الحرام والعيب والمايجووز يفكرون عدل بكلامي ويفكرون اكثر بالكلام اللي يكتبونه قبل ما يسدحوونه لانه ساعات ينرفز ويخرب الموضوع ويسبب نجرة واذية الكل في غنى عنه خلوا كل وحدة هني تعبر عن رايها وموضوعها بكيفها لحد يتدخل باحد اذا الموضوع ماعجبج خلااص اطلع وكيفها صاحبة الموضوع تصطفل اهيا كيفها وماتقدرين تدشين بكيف وفكر وبيئة الناااس خلوا المتزوجاات يتنفسووون وياخذوون راحتهم بروحها الوحدة تلقيينها منحاشة من هم ريلها اتيين تهمينها وتنكدين علييها زووود؟؟؟ اووووووف!!!