شوفوا هالزوجه المسكينه !! تبيها طرب صارت نشب !! قصه واقعيه

اليوم جايبتلكم خوش قصه تونسكم بما انه ويك اند ..

وبقولها مره وحده عشان ماتاكلوني بقشوري خخخخخخخخخخخخخخ <<< اخلصي ياملغج

* * * * * *

في وحده حبت ولد جيرانهم واهوا حبها حيل من كانوا مراهقين .. كبروا وكبر الحب وياهم

كانوا العايلتين على قد الحال بس عايشين مثل مايقولون والحمدلله …

اتفقوا ع الزواج شرح لها ظروفه ودخله المحدود والبنت كانت متمسكه فيه وماتبي غيره

وافقت ع كل شروطه وتزوجوا _ حطلها غرفه وحده مع اهله وتكرمون حمامها .. والبيت كان زحمه

عليهم واخوانه وايد ماشالله وكل سنه واحد متزوج .. تمر السنين مابين حلو ومر …

صار عندهم عيال وضاق عليهم المكان .. حاولوا ياخذون غرفه ثانيه يوسعون ماكو مجال !!

حاول يطلع برا ياخذ سكن ايجار ماقدر امكانياته كانت حيل محدوده …

اقترحت عليه زوجته انها تتوظف عشان تساعده ماديا … لكنه رفض لانه يغار عليها حيل ومايأيد هالفكره

من رياجيل اول … والقصه صايره بداية التسعينات يعني شوي قديمه لوووول

المهم صار اللقاء الزوجي يابنات بينهم صعب والسبب انه عيالهم معاهم بنفس الغرفه ..

لاحظت الزوجه ان زوجها بدا يصير عصبي وبدا يتنرفز على اي شي !!! والمشكله امكانياتها

اهيه بعد محدوده !! اللي قدرت تسويه ان لم اهلها مره طلعوا بر راحت اقعدت بالبيت ذيك الليله اهيه وزوجها

وظلوا على هالحال واللقاء الحميم بينهم بالحسره !!! وبالويك اند اهيه تروح عند اهلها واهو يطلع البحر

مع ربعه .. وحتى مايرضى عياله ينامون عند خوالهم مع انهم يم البيت .. يعني كان شديد حيل

مره من المرات كانت الزوجه بالمطبخ تسوي الغدا حق حمولتها .. والا طلت شافت غرفه صغيره بالملحق ..

قالت بينها وبين نفسها انا ماعمري دشيت هالغرفه خل اشوف اشفيها ؟؟؟ لقتها مقفوله

قالت حق الخدامه وين مفتاح الغرفه ؟؟ قالت الخدامه عندي ( طبعا الخدامه قديمه عند خالتها وثقه )

قالتلها شنو فيها الغرفه ؟؟ قالتلها الخدامه : ماما الغرفه فيها اغراض البر والشاليه .. يعني مخزن ..

ومارضت تعطيها المفتاح …

راحت الزوجه وقالت حق خالتها كل السالفه وانها محتاجه للغرفه … قعدت خالتها تضحك

خالتها كانت مره طيبه ودينه .. قالتلها زين يابنيتي والاغراض وين نوديهم ….؟؟؟؟

فكرت اهيه وخالتها وجابولهم عامل سوالهم كيربي صغير فوق السطح ونقلوا كل الاغراض اللي

بالغرفه … طبعا كان الموضوع سر بين الجنه والخاله …

راحت الزوجه للغرفه المتروسه غبار .. واسبوع كامل تنفض فيها وتفركها وتلمعها وراحت يابت

فراش من بيت اهلها وحطته .. شرت هالكفر الاحمر وحطته .. الغرفه فاضيه مافيها الا الفراش

يابت طاوله صغيره وحطت عليها ابجوره صغيره فيها ليت احمر .. ونثرت الغرفه ورود …

راحت لواحد من هالمعارض وشرتلها ذاك اللبس ( لبس رقاصه ) وقالت بسويله ليله تعوضه

عن ليالي الحرمان .. وقالت بنطر الويك اند عشان تطول السهره وتحلى …

اليوم الجمعه الزوج قاعد بيروح للصلاة .. صار بينهم هالحوار :::

الزوجه : حبيبي ,, وين بتروح الليله ؟؟

الزوج : كالعاده بطلع مع الربع البحر وارد الصبح احط راسي وانام .. ليش اشعندج ؟

بتروحين مكان ؟؟

الزوجه : لا ماني رايحه اليوم .. حتى اهلي ماني رايحه لهم .. بقعد عندك واحشني

( قالتها بضحكه ونغزه من عينها ) ودها تقول وماودها قالت بخليها مفاجأه

الزوج : والله مادري انا وعدت ربعي اشوف اذا قدرت ايي مبجر ييت .. واذا ماقدرت

عادي ليله تعدي مثل كل ليله ( قالها بياس كنه يقول شبتسوين يعني !!)

المهم الزوجه ضحكت وطلع الزوج .. مر اليوم كله والزوجه تحورف بعمرها وتضبط نفسها

لليله الوعوده .. صار وقت العشا وماتعشت .. وخالتها تضحك عليها هاااه مشتطه اليوم ههههههه

طارت المطبخ وحضرت ذاك العشا اللي هوه ( فايف ستار ) ..

عشت عيالها ونيمتهم ولبست وتعطرت وتسنعت ع الاخر حطت ذيك البطاقه على مخدة زوجها وكاتبه

تعالي تحت انا بالملحق… راحت الملحق تقرقش اهي وخلاجينها خخخخخخخخخخ ..

صارت الساعه 12 والاخت تنطر …. صارت الساعه 2 لاحس ولاخبر للزوج !!

تدق والا الجهاز مغلق … قالت بنطر الحين ببطله وبيدق ( الزوجه ماعندها نقال قبل الهبه بالنقال ) …

صارت الساعه 3 وراحت الزوجه بسابع نووووووووومه !!!

الساعه 6 الصبح دش الزوج البيت وكان راد من البحر تعبان ورايح يدور النوم بس

دش الغرفه مالقى زوجته انصدم !! دور بكل مكان مالقاها ..ومن التعب مانتبه للبطاقه ..

نزل يركض مثل المينون .. طلع برا مايدري شيسوي وبنفس الوقت ماحب يخرع امه واهيه نايمه

مسك التلفون ودق على بيت اهلها رد اخوها قاله : فلانه عندكم ؟؟؟… اخوها : لا اصلا ماجتنا

اليوم ولاشفناها .. قال الزوج بعصبيه : انا توني راد البيت عيالي نايمين واختك حضرتها موموجوده

عصب الاخو وقال حق ابوه وراحوا لبيت الزوج _ بهاللحظه الزوجه حست بشقة النور وقعدت من

النوووم ( صح النوم خخخخ)

قالت بصعد داري خلاص الظاهر ماراح يجي اليوم يمكن بينام بالشاليه خن اروح اشوف عيالي

اللي مادري عنهم من امس ,,,

واهيه طالعه تمشي بمكياجها وشعرها ولبس رقاصه عليها وجايه من الملحق بتصعد فوق ..

والا منو بوجهها ؟؟؟؟ تخيلووووووووووووا !!!

ابوها واخوها وزوجها ………………… وقفت منصدمه !!!

قعدوا يطالعونها حتى اهما منصدمين .. حاولت تتستر … طالعها زوجها بسخريه .. تنهد وقالها هذا ابوج

واخوج اهما اولى بتربيتج روحي معاهم وانسي عيالج !!!!

صعدت المسكينه غرفتها واهيه مكسوره بدون لاتتكلم وزوجها وراها ويصرخ وين رايحه ؟؟ وين رايحه يا…….

اوصلت الغرفه خذت البطاقه اللي كتبتها حقه وعطتهياه …

بهاللحظه صفعها طراق بدون لايشوف البطاقه والا على دشت ابوها ,, مسك زوج بنته وقاله :

ماعاش اللي يمد ايده على بنتي وانا حيي ( يحليل الابو صج مافيه مثل قلبه .. الله يرحمك يايبا )

اخذ بنته ووراح فيها لبيته .. عقب مالبست عباتها وتسترت ..

قالت لبوها القصه كلها .. وخالتها اشهدت وياها وراح الزوج تالي وشاف كل شي بعينه

لكــــــــــــــــــــــــــن !!!!!

الزوجه مارضت انها ترجع له نهائيا … لان كرامتها انهانت وانجرحت .. كانت صابره ع ظروفه

وعلى حالته الماديه التعبانه … وباول موقف يظلمها ويمد ايده عليها …..

الحين ابي رايكم يابنات .. الرجال اعتذر منها وحاول يرضيها بكل الطرق لكن مارضت

كل وحده تحط نفسها مكانها ( اسم الله عليكم ) وتقولنا :::

* شلون تتصرفين لوحاشتج انتي وزوجج مثل هالظروف ؟؟؟ مع انها ظروف انقرضت ..

بس ماعليه خلونا نرجع شويه مووايد لي ورا ..

* شلون تدعين زوجج لنفس هالليله ؟؟؟ تقولين له والا تفاجاينه ؟؟؟

* شلون تتصرفين لو انحطيتي بمثل موقفها المحرج ؟؟

* واخر شي _ شنو احسن وسيله تستخدمها الزوجه لتدارك سوء الظن اللي ممكن انه يصير

من بعض الازواج الشكاكين ؟؟؟

بمعنى اخر .. شلون الزوجه تكسب ثقة زوجها الشكاك تداركا لمثل هالموقف ؟؟؟

اتمنى القصه تعجبكم .. والقصه واقعيه مسولفتها لي اختي قبل فتره وتوني تذكرتها خخخخخخخخ

يعني لامنقوله ولامن نسج الخيال .. وووووووواقعيـــــــــــــــة

انتظر ردودكم الحلوه وتفاعلكم … تحيــــــــــــــــــــــــــاتي