محلاكي بالحرام !!!!

(( قصة حقيقية .. فيها حكمة للمتزوجات))

كنت صغيرة بالسن ( ما راح اقولكم قبل كم سنة طبعا ) …

سمعت من جدتي تحكي للعجايز اللي قاعدين معاها قصة لم افهمها الا لما كبرت (وفتحت باللبن

) ….

تقول جدتي كان عندهم (فالديرة) جيران يمنيين(كانوا يتواجدون في الكويت انذاك) …. الزوج عينه زايغه في ذاك الوقت (الكلام باخر الستينات ) …

مرته شاااااكة فيه … وتسمع ان عنده خرابيط … بس مو قادره تطيح عليه ( تدرون قبل الوسائل محدودة) ..

الموووهم … ان المرة ياتها فكرة ..
لبست عباتها .. وبوشيتها ام اربع قوط … وراحت يم السوق مكان اللي يطلع منه ريلها العادة …

المغرب .. الريال طلع في سيارته على موعده ..

والا المرة واقفة على الشارع … ما صدق على الله يشوف مرة يوقفلها … قالها تفضلي اوصلج …

ركبت جدام .. وهي ما تتكلم .. الا كلمتين وتغير صوتها …

الريال قام يتحرش بالكلام … لا قام يمد ايده .. وهي تخليه براحته …

شاف القصة سهلة …. قام وداها على البحر … ويبي يرفع بوشيتها .. قالت له .. " الستر "

فهم ان ما تبي تكشف ويها ….

المهوووهم .. الريال مطفوق … قام ورفع اللي يرفع … وطاااار معاها في رحله للمريخ

لما خلص شيسمونه …. قالتله " شرايك فيني ؟" …

قالها بحياتي ما شفت شئ بالوناسة والحلاوة و و و.. انتي وينج من زمان؟؟ …. ووصلها السما بالمدح

المرة … رفعت بوشيتها … وقالتله " هذا شغلك يا فلان ؟؟ " ….

طبعا الريال انصدم … وقالها بلهجته اليمنية " اللعن ابوش .. محلاكي بالحرام "

فمن ذاك الوقت جيرانهم سمعوا القصة … وقاموا يكررون كلمته على ضحك .. " محلاكي بالحرام " ….

فالقصة … ان بعض الرياييل …. تلاقين مرته مسكينه ما علامها شئ … ولا ناقصها شئ …

بس الله عامي قلبه … ويستانس على اللعب والخرابيط …

….. لا ويمكن تطلع زوجته احلى مليووووون مرة من طايحة الحظ اللي يطلع معاها …

ويبقى الرجل …. سر غامض لا .. ولن .. ولم .. تفهمه المرأة !!!

……… وتبقى مجرد وجهة نظر