فن التحطيم عند الحريم !!

السلام عليكم ورحمة الله ’’

أتمنى تكونوا بخير ونعمة .. بدش بالموضوع على طول >> ما عندها وقت

أنا عانيت في فترة من الفترات من أسلوب المكايد اللي تتبعه معاي خطيبة حماي وخواتها ريا وسكينة وكتبت موضوع عن مواقفهم معاي وطلبت مشورتكم .

المشكلة الحين صارلي فترة وأنا أتعرض لمواقف سلبية معاهم ومع غيرهم خلت نفسيتي كل مالها في النازل

هم يدرسون معاي فالجامعة وأشوفهم بشكل شبه يومي وأحيان نضظر نقعد فالكافتيريا او استراحات الجامعة ..

وكل ما قعدت مع وحدة فيهم على طول تسمعني من هالعبارات : " اشفيه ويهج متغير ؟ . ليش ضعفانه وويهج اصفر ؟ .. ليكون حامل انتي ؟ .. شكلج تعبااانه حيل .. انتي مريضة هاليومين والا شسالفتج !! .. ليش هالكورس متغيرة أحسج مهمومة ومتضايقة حيل!! .. شكلك ما نمتي أمس وعيونج محمرة انتي متضايقة من شي ؟! .. يا بنت الحلال ليش جذي صايرة هونيها وتهوون !! … الخ

ومن هالعبارات اللي تحطم النفسية

المشكلة أنا كنت اتفاجأ من كلامهم , ويصادف انه بنفس اليوم اكون مسلمة على وحدة من ربعي وتقولي محلوة اليوم ,, او شكلج مبسوطة .. وعكس كلامهم تماماً

هذا غير سوالفهم معاي عن الحمال ونغزاتهم لأنهم يدرون اني متزوجة من 5 سنين ولا حملت فيقطون علي نغزات عن الحمل .

ملاحظة : مو غرور وبشهادة الكل الله عطاني جمال ولله الحمد ومتفوقة بدراستي وعمري 22 يعني اصغر منهم وأدري انهم يغارون من مدح الناس لي خصوصاً اني أجمل من أختهم (( خطيبة حماي)) بمليون مرة .

لكن مع علمي بالغيرة اللي فيهم بس أنقهر من كلامهم ونفسيتي تتأثر ويرتبط لساني اذا سمعت عبارات التحطيم وارد (( يمكن من ضغط الدراسة )) وأحياناً أطنش واقولهم لا عادي يتراوالكم بس!

لكن والله نفسيتي تتأثر لأني ودي أفشلهم وارد عليهم بطريقة توقفهم عند حدهم وبنفس الوقت ما يحسون اني متضايقة من كلامهم .. شسوي يا بنات دلوني ؟؟؟؟

بليييييز لا تقولون عطيهم طاف وطنشي لأني فعلاً اطنش ( ظاهرياً بس ) لكن من داخلي اتضايق وهم يزيدون أكثر ,واصير اتمنى لو اني رادة عليهم رد يحرق دمهم

مثل ما يلعبون بنفسيتي .. فعلاً لما الوحدة تسكّت اللي قدامها بـ رد يبط جبده تحس براحة غريبة خخخ , وانا ماعندي فن الردود المسكته

عطوني حل ترى "شلة حسب الله" هذي فاقعة مرارتي وأختكم في الله ما عندها من كيد النساء ولا تعرف تتعامل مع هالنوعية

والمصيبة احنا أهل ونصير لبعض يعني مضطرة اتعامل معهم واشوفهم يومياً بالجامعة ويجون يقعدون معاي يعني لا مفر

.