الحمدالله انا ولدت و هذي قصتي

الف الحمد الله
والله لو اقعد و احمد ربي ليل نهار ماراح اوفي النعمه و الرحمه اللي عطاني اياها
لان ربي كان ارحم من نفسي و من امي و من كل الناس
سبحانه رحم حالي

انا (كنت حامل و فيني توأم) بالثامن 34 اسبوع و يومين و حدي ثقيله و تعبانه
و اراجع عند شاديه عثمان و بمستشفى الصباح بعد عشان اذا صار ولاده مبكره و طردني الخاص القى ملفي كامل بالصباح
و اتفقوا الدكاتره ان الولاده راح تكون قيصريه عشان وضع اليهال بالرحم كانوا واحد بالطول و راسه فوق و كانت البنت العرض!!! و كنت اساحل الدكاتره يولدوني باسرع وقت لاني كنت من صج حدي مستويه عالآخر بس كانوا خايفين عاليهال
و يوم الاربعاء 28-10 قمت الصبح تعبانه و بالغصب قدرت اقوم من الفراش
و بنتي (عمرها سنتين) تحوس و تبي تلعب و انا حدي مالي خلق
طرشت بنتي تلعب عند يدتها تحت و دقييت على امي وانا ابجي جان تقول عادي لا تخافين هذي تجاديم و سوالف
انسدحي و ريحي و انشالله ماعليج الا العافيه
طبقت النصيحه بس ماكو فايده كان اييني عوار كل نص ساعه
لما يا ريلي من الدوام جان انفجر بجي (فرصه للدلع)

جان يقول يالله نروح الطبيب بس انا قلت لا خلنا المغرب نروح حق عيادة الدكتوره شاديه
و فعلا ظليت صامده
و الساعه 6 وديت بنتي عند امي و رحنا العياده
اول ما دخلت قلتلها ان فيني عوار و ابي تخطيط
و سوولي تخطيط و الا الطلق 100
اخترعت السستر و نادت الدكتوره
جان تسويلي سونار و الحمدالله اليهال بخير الولد كيلوين و البنت كيلو و 950
جان تفحصني و الا انا مفتوحه 3 سم
جان تقول يالله ولاده روحي المستشفى الحين
جان يقول ريلي ان احنا بنروح الصباح عشان انا بالثامن و اليهال صغار
و فعلا طلعنا من العياده و رحت حق امي اتسبح و ريلي راح يجهز صور عقد الزواج و البطاقات المدنيه حق دخول الصباح

الساعه 11 كنت بمستشفى الصباح طوارىء
فحصتني الدكتوره والا 4 سم و سوتلي دخول ولاده
بس ماكان في سرير بالجناح labour room)
و نطرت السرير اللي مافضى الا الساعه 2
اول ما صعدت الجناح ركبولي جهاز التخطيط و سوولي تحاليل
و يأ الدكتور الساعه 2و نص و فحصني و الا انا 5 سم!!!!!! و الطلق 120!!!!!!
جان يقول حق السسترات البنت ده تخش العمليات فورا بس يجهز الدم
و بعد نص ساعه (الساعه 3) كنت بغرفة العمليات
و بنج ابرة ظهر
وولاده قيصريه
و انا طااااايره بوهتي و حدي مستغربه و مو مستوعبه الموضوع
و شالوا اليهال بسرعه
و ودوني غرفة الافاقه و دقيت على ريلي و امي بشرتهم
و بنتي اول ودوها العنايه المركزه و وليدي بالعنايه الخاصه
و بعد 3 ايام طلعت بنتي من العنايه و راحت عند اخوها بالعنايه الخاصه للخدج
يعطونهم مضاد و مغذي و شويه حليب
انشالله جم يوم و يطلعون بالسلامه
ولا تنسونهم بالدعاء
بس بودي اقول كلمة شكر بحق مركز غنيمه الغانم لرعايه الاطفال الخدج
بصراحه رعايتهم اكثر من روعه
وفعلا تطمن قلب الام
و مره ثانيه الف الحمدالله و الشكر لك ياربي