قصه ولادتي وحبستي بالسجن المركزي

السلام عليكم بقولكم سالفت ولادتي

يوم الاثنين 11-8 كنت طالعه مع ريلي بنتغدى وورى الغدى كنا بنرح مراجعتي عند دكتوري بدار الشفا
كنا تونا داشين حولي بالضبط عند مجمع الايوب بنلف والا تدعمنا وحده ولفت فينا السياره المهم ماصار فينا شي بس السياره تعورت .
ما رحنا تغدينا ردينا البيت وغيرنا السياره ورحنا مراجعتي سوالي الدكتور سونار والا ماي حوالي الببي كان قليل وسوالي تخطيط للبيبي وكان الحمد الله ما فيه شي بس قالي راجعني سبوع الياي وضروري
قلت لامي الي صار معاي بالضبط وشنو قالي الدكتور وسألت البنات الي صارلها مثلي قالولي يمكن يدخلج ولاده
امي ثاني يوم قالت لي الاربعا الصبح بمرج واوديج الصباح خلي انتطمن قلت اوكي
يوم المعانات >> يوم الاربعا قعدت 10 ومرتني امي ورحنا الصباح كان ريلي دوام وما يطلع من الدوام الى 7 بالليل
دخلت عالالطوارئ قلت لدكتوره الي قاله لي دكتوري وكتبتلي اسو سونار وتخطيط ، طبعا حكومه مواعيد السونار كان الساعه 5 العصر رديت بيت اهلي صار العصر وداني ابوي علشان السونار وانطر الزحمه والبطئ الموطبيعي المهم خلصت السونار ووديته حق دكتوره الطوارئ بالضب الساعه 7الا ربع لما شافت السونار قالت لازم ادشين ولاده ، هذي اول صدمه والمصيبه انا ابوي كان معاي طبعا بسرعه دقيت على امي وريلي وابوي وخبرتهم وخذو كل ملابسي وموبايلي ولبسوني لبسهم وعطو ابوي كل اغراضي طبعا انا طقيتها بجيه وراحت الفراشه الي ودت اغراضي تقول لابوي اني ابجي (بطت جبدي زين ما صار لابوي شي )
دخلوني الملاحظه من7 لي 9ونص شافني الدكتور وسوالي سونار وفحصني ما قالي شي بس السستر ( اول سستر كانت تهبل وسل وتواسيني ) قالت لي انتي مو ولاده انتي الحين يوديج جناح وانشالله باجر اتروحين بيت
انا اهني استانست
الساعه 10 ونص ودوني الجناح اهناك الحريم يهبلون يسولفون معاي والسسترات عطوني دراعه بس تخيلو تحت الدراعه ماكو شي بالجناح كان في تلفون دقيت على امي وريلي وطمنتهم طلع ريلي وخالتي (امه ) يايين المستشفى سائلين عني ومحد راد عليهم ومتهاوشين معاهم هههههههههههه
ثاني يوم كان الخميس كنت ناطره الدكتور ايي علشان يكتبلي خروج( واثقه) قعدت اسولف مع وحده يمي لما ييه الدكتور ألني وسوولي فحص المهم يالي الدكتور مره ثانيه قال بالعربي لازم ادشين ولاده واذا طلعتي على مسؤوليتج لازم اتروحين تولدين
انا خفت قلت لا مابي اطلع دخلوني ولاده دقيت على امي تقولي كيفج تبيني اطلعج واوديج خاص او تضلين قلت لها مادري بس انا قلت لدكتور اني بولد ، وكلمت ريلي قالي ترى الصباح شطار وانتي حاله خاصه مابي اطلعج وانتوهق قلت له انا قلت للدكتور اني بدخل الولاده وقعدت ابجي واهوا يهديني لبست لبس الولاده مره ثانيه ونزلوني الساعه 10 ونص
الساعه 11 بدو يحطولي طلق صناعي طبعا معانات نوم بالسريروطلق خفيف وسمعي الحريم يولدون بالغرف الثانيه حاشني خوووف من اصواتهم لانه بعضهم يصرخون من قمت راسهم وانا اسمع السسترات تقول معصبه لا تصرخين خلي الصرخه هذي للبوش المهم كل 4 ساعات يحطولي تحميله الطلق لما صار 10 بالليل ييه الدكتور وقال صعدوها للجناح وترد عالساعه 6 الصبح طبعا ما يكلموني جني طوفه بس يكلمون بعض انا سمعته يقول لهم جذي انا انهرت ومت من البجي يا ربي متى اولد تعبت
ومو متعوده ابي اهلي ما احب اظل محبوسه احب اهلي حوالي طبعا على ما تحولت الزامات وتغيرو السسترات رحت الجناح عالساعه يمكن 12 او وحده
وكان الجناح صخه رحت على طول للتلفون بدق على اهلي تخيلو ادق ويطلع لهم الرقم بس ما يسمعوني ولا اسمعهم اهني مت من البجي حاشني مثل الانهيار
رحت لسريري ولا يمي وحده كانت اول ليله ومو قادره اتنام درت اني ولاده وعرفت سالفتي وقعدت معاي والله من السوالف معاها نسيت الطلق ايي ويروح بس مو مهتمته وخلتني امشي بالممرات ومشت معاي وتسولف وتضحكني وخلتني ادق من تلفونها على ريلي اهوا يقول شلونج شصار عليج لا تقطين جذي نحاتيج اقوله شسوي

ماعندي تلفون وبالملاحظه ممنوع وتوني دخلت الجناح
ونسيت اقولكم يوم كنت بالجناح يات فراشه تنادي باسم عايلتي قلت لها انا والا ماسكه اورقه خط امي وكاتبه اسمي مسكينه بتطمن علي قالتلي الفراشه ماما تقولج انتي شلونج قلت لها قولي زينه لما راحت قعدت ابجي زياده

المهم صار الساعه 6 الا ربع ييت الستر وخذتني يمكن نمت ساعه بس
ونزلوني للحبس الانفرادي( الملاحظه )
نوموني على سرير والله لو شنو محد يقدر يتحمله عوار وطلق وسرير خشب مادري شلون صاير وجهاز التخطيط ما يشتغل الا اذا نمت على ظهري وانا ما اقدر
وتناجرت مع السستر الا تغيرين لي السرير تقولي ما عندنا الاسره كلها فل حتى الدكتوره تقولي نفس الشي
المهم السرير الي يمي فضى ولا اقوله نقليني اهني ولا تقول لا ما يصير لا زم اتظلين بالسرير لانه التحاليل كلها اتروح على رقم السرير
عاد اهني انا عصبت قلت لها ناديلي المسئول طبعا اخترعت نادت المسؤوله قلت لها غيرولي السرير بس تعبت لا تقولين ما يصير انتي نامي في وبعدين تكلمي قولي يصير او ما يصير مسكينه قالت مو مشكله تعالي نامي اهني وتقولي على غشمره بس لا تشتكين علينا قلت بشتكي انشالله وبقلب المستشفى فوق تحت( معذوره بالطلق واتفلسف) هههههههههههههههه
انرد للولاده كل شوي اييلي دكتور يحطولي تحاميل وشغلات توسع الرحم الساعه 11 الدكتور قالي بييلج دكتور التخدير وراح تاخذين ابره ظهر
كنت ميته من العوار بس ابجي
على ما ييه الدكتور طبعا سنه انا اتألم زياده واصرخ عطوني كمام كان يخفف شوي لما وصل الحجي قالي بالضبط شنو تأثير الابره ووقعوني على ورقه طبعا انا ما سمعته المهم كنت ابي شي يوخر العوار وعطوني الابره خذيتها ووراها اتخدرت على طول ونمت بس وين بعدها بساعه قعدت على عوار خفيف والا دكاتره فوقي هذا يمكن على الساعه 1ونص سمعتهم يقولون الساعه 3 انيي نشوفها مره ثانيه سألت السستر جم فتحت ولا تقول 4 سانتي الساعه 2 تبدلو السسترات اهني زاد العوار وصرت اصرخ نادو الدكتور واصرخ والسستر اطالعني من طرف عينها جنه مو عاجبها ولا تعطيني اوكسجين والا نبض البيبي يقل وتصرخ علي اخذي نفس البيبي تعبان وانا اخذ واصرخ صرخت اخر شي من قمت راسي ولا تيي السستر تشوف ولا تقول بيبي يطلع يلا بوش
انا تذكرت الي اسمعه انه الصرخه ما تنفع لازم اخلي الصرخه للدفع فمسكت عمري ودفع وتقولي السستر شاطره يلا بوش بعد وطلع حبيبي لما طلع وشفته على طول ضحكت مستانسه اني افتكيت واول شي فكرت فيه اني بكلم اهلي تخيلو للحيني ما تخيطت ولا شي بس ابي اهلي
على ما خيطوني انا ولدت الساعه 2 ونص الساعه 5 يالله بالقصب نزلوني شفت اهلي اهني ارتحت
طبعا اهما معانات خالتي وريلي تهاوشو مع الي بالاستقبال ريلي يقولهم انا بعرف هذا سجن والى مستشفى طمنوني على مرتي
يقولون كنا ندق ويسكرون التلفون بويهنا بس لما ردت علينا سستر وقلنا لها لج حلاوه اذا طمنتينا عليها اهني يالله درو عني

والحين انا كملت 11 يوم من ولادتي وكل ما اتذكر الي صارلي تخنقني العبره وادمع عيني لانه شي فجأه وانا بجر وكنت مخططه اولد بدار الشفا بس الله كتب اني اولد بالصباح والحمد الله على كل حال
وسوري طولت عليكم
ونبي منكم الدعاء وشكرا