لاتقولون لي لطفي زاده تجربتي السيئه معاه

اول شي السلام عليكم شخباركم بنوتات
انا متابعه لها منتدا من سنه واكثر واحبه وايد بس كنت مشتركه بنك اسمه its-ana وماعرف ليش مافعلوه لي والى الحين ماتفعل بالرغم من مراسلتي لاداره المنتدا اكثر من مره
عموما هذا مش موضوعنا موضوعنا اني ودايم اقرا عن تجارب البنات فيه عن عمليات الانف وتعديل الانحراف وبعد بحث وتمحيص رحت للي مايتسمى لطفي زاده حسبي الله ونعم الوكيل فيه هذا اللي اقوله بس لعب بخشمي ولو سمحتو لاحد يدخل ويكتب لي رد يمدحه مع احترامي لكل اللي سوا عنده بس تراه مايعرف لكل لخشوم يعني الخشوم العربيه الطويله اللي فيها عكفه لاتروح له مايعرف الا حق الخشوم الصغيره والفنسا ويسويها ستايل واحد انا لعب بخشمي خشمي كان يهبل طويل وبعدين تسمح لي اللي اكتبت انه طيب واسلوبه راقي اسلوبه من دخلت عليه نفسه بخشمه ويتكلم معاي كني انا اللي بسويله العمليه نفسه خايسه…….
تفاصيل روحتي عنده
دقيت عليه تلفون قبل امشي بسبوع اساله عن تكاليف عمليتي طلب علي 4000 دولار قلت له واجد قالي هذا اجري وماقدر انزل لج فيه واكتشف يوم رحت وقبل لارجع بيوم ان الدكتور هذا لو يدرون عنه المستشفى اللي يسوي العمليه فيه انه مستفيد مابيعطونه فايدته من المستشفى بالعربي خذ علي 1500 دولار في جيبه وهالكلام قاله لي واحد بالمستشفى والمترجم اللي معاي حتى قالي انه ليت اني متصله فيه قبل اجي وبيجيبه بسعر اقل…
المهم وصلت له ورحت عنده واسلوبه زفت واسمحولي على الكلمه قام يصرخ ويوم قلت له انا مابي تغير بخشمي شي بس تعديل الانحراف وازاله العكفه الصغيره قالي انتي ماتعلميني شغلي وربي بهالكلام وانا اعرف شنو اسوي وانجليزيته مكسره ترا جيبيلج مترجم ودخل معاي مريض ثاني وهو يكشف علي ويتكلم معاي ومانكر ان عيادته زحمه بس لاخشوم الايرانيات اللي يبونها شامه السماء ومرفوعه بس الخشوم العربيه وربي مايعرف وين هواء دارها قلت له اوك وقسم بالله يوم طلعت لفوس سحبها من يدي كنه مب صاحي وقالي خلاص روحي بكره المستشفى وسوي تحاليلج قلت ادفع شي قالي لا واروح ونصيب اني مصرفه وادفع لهم من جيبي ويوم قلتله انك كنت بتوهقني لو ماعندي فلوس وكان عندهم اجازه اصلن قالي مو معقوله خليجيه تمشي من غير فلوس فلوسكم واجد .
دخلت وسويت العمليه من 2 الين 6 ويم طلعت الا وجهي متورم وهالشي عادي ومتوقع لكن المصيبه خشمي طاير مع العلم مرو علي ناس هنا بالمنتدا ماكتبو خشومهم تطير فوق ويوم فكيت القطعه اللي حاطها علي ماوعيت الا خشمي كنه مايكل الجاكسن

حسبي الله ونعم الوكيل فيه الله لايوفقه يوم قمت اصيح الا يقولي لاتناقشيني تعالي عقب سنه قلت له انت صاحي انا ماقلتلك نحته لي انا قلتلك خله مثل ماهو ليش ترفعه لي لي كذا قالي انا اضفت لج لمسه جماليه وبتشوفينه عقب سنه وربي ان الحين كملت شهر وتحسفت قد عدد شعر راسي اني رحت له وشفت واحد يشتغل بمحل فضه في في منطقه اسمها شنديز مسوي عمليته تهبل كان مثل خشمي قالي ليش سويتيها عنده هذا سمعه على الطل تبين في الدكتور رقم واحد على مستوى ايران اسمه النعيمي بس ماعرف اسمه بس قالي النعيمي ممتاز والثاني بعد بور صادق بس لطفي زاده هذا بس سمعه
ان انصح اي وحده بتروح له اذا خشمها عربي وطويل لاتروح له نصيحه اقسم بالله كني مسخ وان نفسيتي تعبانه وماطلع من حجرتي كله بسبته وادعي عليه لانه قلت له لاتحرك خشمي خله مثل ماهو وهو سوا اللي على كيفه
وهذاني انتظر اخلص السنه واروح دكتور تجميل يرقع اللي سواه ويكبر لي خشمي اللي ابد مايناسب ويهي
نصيحه يابنات وربي من باب ان الوحده ماتتوهق لاتروحون له اذا خشمج طويل لانه مايعرف له
وبس ولا تقولون لي صبري توج شهر ترا البنات تبين خشومهم من اول شهر اذا حلوة او لا على الاقل على القالب مش انا طاير كنه خشم فرنسيه وصحراء بينه وبين براطمي حتى المنظره ماشتهي اوقف قدامها والحين خشمي االيمين ينزف يوم كلمته قالي عادي وطبيعي حسبي الله عليه ونعم الوكيل
وبس حبيت انقل لكم تجربتي معاه بالعربي خشمج طويل لاتروحين له