بكالوريوس تغذية :)

السلام عليكم بنات شلونكم
اول شي احب اعرفكم بنفسي انا خريجة بكالريوس تخصص تغذية

وبما انه احنا الحين عايشين في عص الريجيم والرشاقة والرياضة حبيت انقل لكم جم معلومة من خبرتي
حبيباتي
اول شي انا من تعلمت من خلال سنوات دراستي انه عشان امشي على دايت معين او حمية غذائية محتاجة اني اروح اسوي تحليل دم شامل وادخل على دكتور عشان يشوف اذا كل شي اوكي عندي ولا لا و تعلمت اني ما احرم نفسي من شي بس اضبط نفسي واحدد حق نفسي كمية معقوله من الاكل اللي باكله وتكون شاملة المجموعات الغذائية الاربعة
يعني الريجيم اللي هابين فيه يوم كامل عنب ويوم كامل مادري شنو ويحرمون نفسهم من الاكل لفترات طويله احب اقولكم حبيباتي ترى هذا غلط
انا اقولكم ليش
لانه الجسم ذكي بيشوف انه انتي مو قاعدة تاكلين الكمية اللي يحتاجها جسمج حلو ف يقوم يخزن الدهون عشان عمليات الايض وبجذي ما راح تنزلين
يعني احسن شي تسوينه وانا جربت هالشي لي و لزوجي اني احدد حق نفسي كميات الاكل من كل المجاميع الغذائية واهيا عشان الكل يستفيد:
1. مجموعة الخبز والحبوب: احدد حق نفسي كمية معينة من هالمجموعة يعني ريوقي يكون نص خبزة لبنانية او خبزة خفيفة كاملة او كوب كورن فليكس ويا حليب خالي الدسم او على الغذدا 6 قفاش عيش مشخول او 3 قفاش عيش اذا كان مجبوس
2. مجموعة الحليب ومشتقاته: احاول كثر ماقدر اني اشري حليب خالي الدسم او قليل حق اللي مايحب اوكي حتى الجبن او اللبنة واتجنب الالبان المالحة لانها تمتن
3. مجموعة اللحوم والبقوليات: احدد حق نفسي كوب من الخضار السوتيه مفيد ويشبع او اذا باكل دياي من الغددا اذا كان مجبوس اكل الصدر دهنه اقل وافيد وهم اذا مشتهية بيض ثنتين بالاسبوع او ثلاث حق اللي ما فيهم كوليسترول
4. الخضرراوات والفواكة: حاولي كثر ما تقدرين تاكلين خضرة وايد على الغدا او العشا او الريوق جرجير وبربير ورويد طمام خيار اللي تحبين من هالسوالف اككلي سلطة وحاولي تقللين الدريسنج لانه في دهن ويمتن >>السلطة فيها الياف وتشبع وتخليج تحسين انج شبعانة لفترة طويلة عن تجربة واذا ما تحبين تبلشين فيها اكليها اخر شي عقب ما تخلصين وتكون كوب او كوبين
وفي بعض العلماء الانجليزيين صنفو المجموعة الخامسة على اساس انها الدهون والحلويات بس طبعن باعتدال يعني السلطة يكون فيها بس ملعقة زيت زيتون واذا تبين تقلين شي حطي نقطة او ملعقة صغيرة زيت زيتون افيد من الزيت العادي طبعن كل ما قللتي احسن بس هم الجسم يحتاج كمية قليلة من الدهن بعد
بالنسبة للحلويات واللي اهيا نقطة ضعفي حاولي اذا ما تقدرين تستغنين عن الكاكاو انج تاكلين قطعة صغيرة او قطعتين مو بار كامل لا تحرمين نفسج لانه كل ممنوع مرغوب مثل ما انتو عارفين
بالنسبة لوجبة الريوق وايد مهمة لانه تعطيج طاقة ولاحظي نفسج لما ما تتريقين تاكلين طول اليوم وايد واكثر من لما تكونين متريقة يعني الريوق مهم حق الل يبون يسوون ريجيم وحقنا عموما
وبعدين شغله ثانية احب انوه عليها >>>حلوة انوه …لا تخلون فترة طويلة بين الوجبات يعني اللي متعودة تشرب جاي او قهوة شربي حبيبتي بين الوجبات او عقب الوجبة بساعة او ساعتين عشان ما يمتص الحديد وقللي السكر يعني ما يزيد عن ملعقة وحاولو تقللون من السكريات الصناعية لانه سمعت كثرتهم مو زينة من كذى دكتور و بعد اذا انتي متعودة تاكلين سناك بين الوجبات خلي عقب الريوق سناك مثلن حبة فاكهة او كوب سلطة فواكه او عصير فرش او قطعتين من بسكوت دايجستف لايت لانه فيه الياف ويشبع
اتمنى اكون افدتكم بهالنصايح حبياتي وانا اول مرة اشارك بحاول ارتب اففكاري واكتب لكم عن اشياء ونصايح مفيدة لكم وهم عن اشياء واكلات انا جربتها وتشبع ومفيدة
اخر شي احب اقولكم ترى مو شرط الريجيم اللي ينفع معاج يضعف غيرج لانه كل جسم يختلف عن الثاني وبعدين يمكن انتي الريجيم اللي تمشين عليه يكون غني باكلات فيها حديد لانه عندج انيميا غيرج مافيها او يكون انتي فيج سكر بعيد الشر والثانية مافيها او ضغط او اي مرض قوقون او اي شي ثاني وبعد ترى الرياضة مهمة حقنا كلنا سواء الي تبي تضعف ولا لا عشان نعيش بصحة وعافية واقل شي تكون 30 دقيقة او نص ساعة بشرط انج تعرقين وتبذلين فيها مجهود ويحبذ تكون كل يوم واذا ما قدرتي على الاقل 3 مرات بالاسبوع
اخر شي اتمنى اكون فدتكم مرة ثانية واحبكم كلكم وناطرة ردودكم وتعليقاتكم