صينيه البيديان بالدياي الحامض حلو بناء على طلب الجماهير

اولا نقصص البيديان شرايح دائريه ونقعها بماي وملح وبعدها صفيها من الماي واقليها بالزيت

وسوي الصلصه الحامض حلو

عباره عن 4 حبات طماط مهروسين مع فصين ثوم هارستهم وفلفل احمر حار الكميه حسب رغبتكم
ملح وحبه ماجي

نص جيس صبار منقع بماي حار ومصفي من الطعام

علبه معجون طماط

3 ملاعق كبيره شكر

الطريقه
اقلي الثوم مع الماجي بشويه زيت وبعدها احط الطماط المهروس واقلبهم

احط الصبار المنقع مع علبه المعجون طماط والفلفل الاحمر

لاتنسون الملح والشكر بالاخير مع اضافه كوبين الى ثلاث ماي مغلي

وانتو ضبطو الملح والشكر حسب مذاقكم

طبخيهم 5 الى 10 دقايق لما تثقل شويه

اخذي نص ديايه وسلقيها بماي وملح وبهارات عدله وبعدها قطعيها شرايح

اخذي صينيه بايركس وحطي ربع كميه الصلصه وعليها نص كميه البيديان

وحطي عليها جبنه مزرولا

وفوقها شرايح الدياي ورشي عليهم اوريجانو

وبعدها باجي البيديان والصلصه

دخليهم فرن حار نص ساعه او لما تتشرب اغلب الصلصه

طلعيها من الفرن وشكلي بالمايونيز خطوط بالطول والعرض على شكل مربعات ورشي بكل مربعه جبنه مازرولا

ودخليها بالفرن واهو مسكر بس على حراره الفرن علشان تذوب الجبنه

وقدميها هني ومري

وايد لذيذه مع الخبز او العيش والجبن يتمغط يهبل

والحمدلله