الوسم: الاناقه

صباحكم \ مسائكم
ورد ومسك وياسمين

كل وحده دخلت هالقسم وفرفرت فيه تتأكد وتيقن انها مره نظيفه وتحب النظافه حتى لو كانت تحس احياناً بكسل وتاعجز ع اعمال بيتها بس من داخلها تحب بيتها دايماً انيق ونظيف والريحه الطيبه تفوح منه …

كل يوم بندش هالموضوع نعين ونعاون ، كل وحده تقول شسوت أو شنو تبي تسوي أو شغله تبي تسويها ومو قادره تبي تصيحه مساعده استشاره ، كلنا بنتعاون ، كل وحده تكتب لنا ، شلون نظفت شلون عطرت شلون غسلت شلون رتبت كل شي تكتبه كـ تشجيع ،، انا عن تفسي من أشوف وحده تتكلم عن التنظيف والتعطير والترتيب أتشيش ودي أقوم أركض بالشقه ماشاءالله

بنقسم شغلنا على أيام الأسبوع عشان مانتعب ، وفي تنظيف يكون يومي اسبوعي وشهري ايضاً …

أنا ببدأ

بسم الله

تنظيفي اليومي

الله يسلمكم قعدت اليوم الصبح الساعه 8 ، جهزت الريوق عقب ماتريقنا وطلع زوجي ..

غسلت المواعين وعقب غسلت الحوض عدل وطلعت رحت الحمام عزكم الله

غسلته الغسيله اليومي ، كتيت جف ع الأرضيات وكتيت عليه ماي وفركته شوي وخليته عقبه غسلته بماي وفركته عدددل ، بعدين حطيت داك وفرك الارضيه عدل خليته ورحت صوب المرحاض حطيت فيه من داخل هاربيك وخليته شوي بعدين غسلته عدل بالفرشه ونظفته وحطيت قرص من مستر ماصل برائح الافندر ، وغسلت الارظيه عدل والمرايا ونشفتهم وشغلة شموع الفانيليا الي من ايكيا وطلعت ..

طبعاً غسل الحمام الاسبوعي يكون نفس جذي بس زياده عليه احط كلوركس واغسل الشور بوكس والارفف كلها الي بالحمام ، الشهري يكون زياده عليهم الفلاش لان كثرته مو زين ع الارضيه ..

الشقه مرتبه الحمدلله ، بس جبت المخمه خميت الغبره والارضيات عدل عقب جبت السطل مال المسح حطيت فيه ماي وديتول ومسحت الارظيات كلها عقب كتيته وحطيت ماي وحطيت عليه نقط من دهن العود و زيت من زيوت الفواحات الي عندي ، أفضل نوع ( فواحة العذريه من الماجد ) الماجد موجود بالسعوديه كل ماراح زوجي او احد من اهلي وصيته يجيب وفي بعد زيت عطري للفواحه هم من الماجد اسمه ريما يجنن ، حطيت جم نقطه من العذريه وجم نقطه من دهن العود ع الماي ومسحت الارظيات كلها الريحه خياااااااااال تهبل ..

بعدين جبت خلطه من الرشوش الي أنا مخلطته ورشيت الشقه كلها وشغلت معمول الدواسر فديتهم ، طبعاً ما استغني عنه مع رشوش الشقه يخلي الريحه تثبت ، وشغلة فواحه بالصاله وفواحه بغرفة النوم ..

طريقة الرشوش الي أسويه كذا نوع كل يوم أخلط لي خلطه جديده

امس سويت خلطه تهبببل

جبت

رشوش جواهر ( من عطورات ام نوره )

رشوش نوره ( هم من عطورات ام نوره )

كلونيه

عطر ( الأسطوره من عطورات الحجر الاسود )

عطر ( رفاه من عطورات بشرى )

وحطيت من كل نوع نص نص والكلونيه هم بعد تقريباً ربعها مو كلها وعطر الاسطوره ورفاه قعد ارش منهم داخل الغرشه الي خلطت فيها ..

رجيتها عدل وعطرت شيلتي كـ تجربه الريحه تهبل زوجي يقول خليه اتعطر منه ع ثيابي والغتر هههههههه

لان ريحته حيييل جذابه وحلوه وقويه

بس خلصت هذا كان شغلي اليوم

وانتوا شنو شغلكم اليوم او شنو جدولج الي محظرته لليوم

عفيه بنات نبي تشجيع مابي احباط

في انتظاركم حبيباتي