أفكار للزوج المسافر:)

هلا حبايبي
بما ان زوجي العزيز مسافر بكتب لكم جم فكرة سهلة وبسيطة تستعدين فيها لسفر زوجج وراح تترك الاثر الطيب على نفسه:
1)اذا صمم زوجج على السفر بروحه او مع ربعه وكان في ثقة متبادلة بينكم (يعني انتي عارفته مو راعي خرابيط)لا تمنعيينه من السفر او تلزقين فيه وتقولين له ريلي على ريلك،
عطيه مساحة من الحرية لأن كل رجل يحتاج انه يكسر روتين الحياة الزوجة وينسحب شوية من حنة العيال وقرقة أم العيال وصدقيني هذا التجديد راح يخليه يرجع وهو بقمة الشوق والوله لج ولبيته.

2)حتى لو كان مضايقج هالموضوع لا تبجبجين وتحنين وايد بالعكس زهبيله جنطة السفر والابتسامة مرسومة على ويهج وقوليله(اذا انت مستانس جني انا المستانسة)لأنج مهما كنتي متضايقة فهالشي ماراح يثنيه عن السفر اذا كان معزم فخليه يذكر أخر الايام ابتسامتج مو نكدج وهمج وغمج.
3) كوني متحمسة حق سفرته يعني اذا كان رايح دولة يديده عليه طلعيله من الانترنت جم منطقة حلوة وجم رحلة والاهم اسماء السوقة وكوني متحمسة وانتي تسولفين عنهم عشان لاراح لهم واستانس يحس بتأنيب ضمير انج ماكنتي معاه.
4)حاولي آخر أسبوع تكونين جدا وديعة معاه وطيبه وحبوبه عشان يذكرج بالخير بس لا تنسين آخر يومين النظرة الحزينة وكلما سولفتي وضحكتوا واستانستوا مع بعض سلهمي شوي بعيونج وسرحي بعيد واذا قالج بشنو سرحانة قوليله ماكو شي حبيبي وخليه يحن عليج شوية بعدين قوليله راح افقد االقعدة الحلوة معاك.
5)اذا زهبتي جنطته حاولي انج ما تنسين اهم تفاصيله ، فرشي ارضية الجنطة بورق معطر(من الشايع اولاندمارك)وصفي هدومه بعد ما تكونين معطرتهم ومبخرتهم عدل وحطي بينهم علب الكومفرت المعطرة(من الجمعية)عشان كلما لبس وشم ريحتهم الطيبة ذكرج وذكر سنع أم عياله.
6)بعد ما تصفين هدومه حطي جنطة صغيرونه حق (فرشته ومعجونه ومشطه وعطر صغيروموس حلاقته) ولا تنسن شامبوه المفضل بس أصغر حجم ولوشن هم بعد أصغر حجم وسجادته ومصحف صغيرونو وشوفي بعد شنو يحب زوجج يستخدم المهم لا تنسين ابسط شي الا وتحطينه عشان اذا احتاج شي ولقاه بالجنطة راح يحس بقيمة مرته السنعه،
ملاحظة: اذا كام زوجج من الوزن الثقيل لا تنسين تحطيله بودر خوفج يحوشه بوزليقة مع المشي.
7)حطيله جم كرت بين أغراضه كتبيله فيهم اشكثر انتي راح تشتاقيله وان الديرة ظلمة بدونه ومن هالحجي عشان يضيق خلقه على مرته المسكينة اللي ضاعت بدونه!!
8)قبل لا تصكين الجنطة حطي المبخر داخل الجنطة وصكي ثلاث ارباعها (بس ديري بالج مو ينقلب على الأغراض) عشان تلزق ريحة البخور عدل وصكي الجنطة على طول وصدقيني لا فتحها وهو مسافر راح تكفخ بخشمه وخشم ربعه ريحة البخور وبيقولوله يا بختك على هالمرة السنعة

9)آخر ليلة قبل السفر خليها غير وشوفيلج وحدة من هالليالي اللي بالمنتدى واللي يحبهم قلبه عشان طول ماهو مسافر بس يذكر هالليلة الاخيرة ويحس بالشوق.
10)ودعيه بكل حب وخلي دمعة صغيرونه تنزل (بس مو تنوحين ترا مو فاضي يسكتج) وادعيله ان الله يحفظه ويرده لج ولعياله بالسلامة وخشي ورقة الطلبات بعدين بالتلفون قوليها عشان يحس ان فراقه نساج طلباتج.
11)اذا سافر بالسلامة خليها فرصة للحرية لج انتي بعد يعني اخذي راحتج بهواياتج اللي كنتي محرومة منها وهو مجابلج بس هذا مو معناته انج تتمادين لا ديري بالج حفظي نفسج وبيتج وعيالج بغيابه عشان الله يحفظه لج وتذكري (كما تدين تدان) يعني لا تسويين شي يكرهه عشان لا يسوي فيج نفس الشي.
12) اذا اتصل عليج وهو مسافر سوي روحج خانقتج العبرة وقوليله انج ما تقدرين تعيشين بدونه( الجذب بين الزوجين حلال) واذا كان عندج عيال قوليله اشكثر اهما فاقدينه وانهم صاروا عسرين واستمرضوا من يوم ما سافر(عشان يفكر ألف مرة قبل لا يسافر بروحه مرة ثانية)
13) قبل لا يرجع سوي تغييرات بالبيت يعني غيري وضع الاثاث وحطي كفر من زمان ما استخدمتيه بس ها مو تخبين روحج وايد ولا تيبين له بوكيه ورد يعني مو معقوله بتكافئينه على سفره استانس فيها من غيرج.