ااااااااااه يا بنات منقهرة من مرت حماي . شورو علي شسوي ؟؟

السلام عليكم يا بنات انشالله طيبين :

اليوم يا بنات بقولكم شي صار وياي من فترة وياليت تقولولي رايكم

انا الله يسلمكم متزوجة صارلي3 سنوات وزوجي اصغر اخوانه يعني انا اصغر جنة فيهم وساكنة مع بيت حمولتي بس شقتي
فوق بروحي وحريم حمواي 3 غيري كل وحدة بشقة بروح بس وياي بنفس البيت يعني البيت نظام شقق عرفتو وخالتي ام
ريلي الدور الارضي لها ….. المهم … اهل ريلي من عايلة غير عن عايلتنا يعني من قبيلة ثانية يعني انا غريبة عليهم
وطبايعهم غير عن طبايعنا … ماطول عليكم السالفة ومافيها ان حريم حموريني يغارون مني غيرة مو طبيعية بحكم اني غريبة
عنهم احلى منهم واصغرهم ولله الكمال طبعا هذا مو غرور بس هذا الصج … وكذا مرة من نتجمع تحت عند خالتي اطب

عليهم وهم يحشون فيني وفيني كيت وكيت يعني ماخذين ذنوبي كلها وانا ما ارد عليهم ابدا لان مو من طبعي انا يا بنات ولله الحمد انسانة مسالمة مو شرانية وماحب المشاكل كلش ملش واتحاشها وطيبة حيل ع نياتي واحب اخدم الناس واحب الخير للكل وكذا مرة حريم حمويني يحاولون يجروني بمشاكل وعوار راس ويحشون فيني بس انا اسكت واتحاشاهم واعطيهم طاف وهذا اللي قاهرهم … طبعا انا عندي بشقتي تلفون بيت واهو مشترك بيني وبين مرت حماي … ريلي عيزت فيه يحطلنا تلفون بروح قال ماله داعي وانا قلت اوكي لاني ما استخدم التلفون وايد قليل حيل وصار التلفون بينا مشترك يعني ان رفعت السماعة اسمع شتقول وان انا رفعت سماعتي هم تسمع شقول بحكم انه مشترك بيني وبينها ….المهم … انا طبعي حيل حياوية واستحي وما احب اضايج احد بشي فهذا التلفون قمت ما اجيسه خير شر خوفا من اني امسك سماعة التلفون واخاف اهي تكلم اهلها او شي فأنا مابي احط نفسي بموقف محرج وتقول عني اني اتجسس عليها وكنت عروس واستحي فما قمت امسك التلفون كلش ابد الا اللهم المكالمات الضرورية بتقولون اني خبلة اقولكم خبلة ونص لاني طمعتها فيني علبو هذي ما تتكلم فيه ولا شي فخذت راحتها ع الاخر … وفي يوم من الايام سبحان الله الله طيحني عليها فجأة بدون سابق انذار سبحان الله يمكن لاني طيبة وع نياتي … مرة كنت توني ياية من السوق وكانت هذي مرت حماي ويانا رايحة بسيارة ريلي للسوق لان ريلها عنده ظروف وماخذاها فيت انا الخبلة وقلتلها شرايج تروحين ويانا لانا بنروح السوق واهي استانست ماصدقت خبر وتجك ويانا بالسيارة اول الناس وريلي قطنا بالسوق وضلينا انا ووياها نتشرى وردينا البيت والا تبطل اغراضي تعالي خل اشوف شمشترية وانا ع نياتي اطلعلها الاغراض وتقعد تنبش فيهم وتأفف وويها ايصير احمر واسود من القهر وتجاملني انهم حلوين وترزز وياي بتشيلهم عني للدرج فوق لشقتي وانا اقولها ماله داعي … تالي كلمن صعد لشقته وقفل … تالي امي دقت علي وانا ماكو رصيد جان ايي اشيل سماعة التلفون المشترك بيني وبين حماتي اللي قبل شوي اكلمكم عنها والا اسمعها تشاهق بالتلفون وتقول لاختها بسرعه بسرعه عطيني امي بقولها ع شي خطير والا تطلع امها بالتلفون وتقولها يا يما طافج اللي شفته الثور اللي تحت ( طبعا تقصدني ) توه طب من السوق ويايب السوق كله ولا يايبة من الماركات والسنع مالت علي يا حظي انا حدي سوق بو امية وقعدت المرة تتحسر وتتحلطم وامها تقول والله زين مالت عليها شكبر حظها عند المخدي هذا ( تقصد زوجي ) واهي ترد ع امها تقول طيح الله حظه الخبل شمحببه فيها هذي ع شنو بالله اكيد مسويتله عمل والا شكو لازق فيها ومدللها ومدلعها …. اثاري المسكينة ميتة قهر مني ومن ريلي خصوصا ان ريلي يحب يحارج بحريم اخوانه ويقعد يدلعني بأسمي ويتغزل فيني جدامهم فأهم ميتين قهر وخصوصا مرت حماي هذي الحية الذيبة تتميلق جدامي وتسوي روحها طيبة وحبوبة وتطعني من وراي يا سبحان الله مع اني ماسويتلها شي بس ميتة من الحرة مني … بس بعدين دريت انها كانت متمنية ريلي لخواتها العوانس طايحات الحظ يعني بالعربي حاطات عينهم عليه وهو ماخذا منهم لانهم جياكر وريلي يبي مزيونة … وريلي لله الحمد صج مو ذاك الزود بالشكل والجمال بس اخلاقه زينة ريال مركزه عالي وجيبه دوم متروس وكريم مايبخل ع احد فعشان جذي الاخت وخواتها طمعانات بريلي وكانو يبونه بس من خذاني حقدو علي انا زين شكو .. بس لو اقولكم عقب سالفتها هذي يومها تحش فيني بالتلفون قمت ما اواطنها بعيشة الله ومو اول مرة تحش فيني وتذمني دايم اجكها تحش فيني بالتلفون ومو تقولون يا بنات اني متعمدة والله اني احيانا مو متعمدة ع نياتي بس الله بيكشفها ويكشف الاعيبها حسبي الله عليها تخيلو مرة جكيتها تحش فيني عند خالتي ام ريلي وتقول عني اني كمبل بس نايمة 24 ساعة والله يعين ريلي علي ومادري شنو … امانة بنات مو شي يقهر ويكدر الخاطر .. وانا تراني للحين ما صارحتها ولا جبتلها طاري اني سمعتها تحش فيني ولا شي .. والحين علاقتي وياها سطحية من فوق لفوق بس لا اكثر ولا اقل .. ادري هذرتي طويلة بس هذا من حر ما بقلبي عليها الله ينتقم منها ومن كل ظالم .. الحين السؤال يا بنات مرات من اشوفها ودي امصع رقبتها وربي قمت اكرهها وما ادانيها خصوصا لما تجاملني وتسوي روحها وياي حبابة وتضحك وياي .. شرايكم اني اصارحها واكلمها بهالخصوص هذا لاني بصراحة خاشة بقلبي وما احب اني اشيل ع احد واقولها شنو السبب اللي يخليها تكرهني والا اسكت احسن لي ؟؟؟؟ شورو علي يا بنات واسمحولي ع الطالة بس شسوي حدي منقهرة