العيب فيج والا في خالتج ام ريلج ؟

اهلين خواتي

للاسف نلاحظ ظاهرة كره الجنه للخاله.. يعني بزمن اول كنا انعذر الجنات اولا لانهم مجابلين وي الخاله وكثرة الاحتكاك لابد بتييب مشاكل وثاني شي كانت الجنه تكرف وغير هذا ما كانو متعلمين!

الحين شالعذر! استغرب صراحة اذا الجنه قارنت روحها بخالتها! مو يا مره هذي حسبة امج ! ليش تاخذين الامور معاها بتحدي؟ يعني لو رفيجتج يبدر منها شي شين يكون حلو على قلبج وتعطينها مليون عذر واذا خالتج قالت شي قلبتي الدنيا! هل فعلا تعاملين خالتج مثل امج ؟ والا عادتها وحده من رفيجاتج ومو محترمه سنها! انتي الغريبة وانتي اللي مفرضون تحببين روحج مو تحسبين روحج ملكه ومتفضله على الناس لانج ماخذه ولدهم!الللي متكله على حمولتها بالسكن بدون لا تدفع دينار واللي متكله عليهم بالاكل والطباخ واللي حتى الزواره ما تزور واذا زارت النفس اللهم ياكافي! والا اللي ما اتعرف خالتها الا حق التشكي والقثا! واللي تتفنن بالتغبي عن خالتها تحمل بسكات تسافر بسكات وطايحه بالريل تكوك! والا اللي تحر خالتها باعيالها انهم يحبون اهلها اكثر تقولون قاعديت بالروضه! واللي ولبها بس حش بخالتها تقولين عدوتها! ترى خالتج مره عوده وشافت من الشقا اللي يكفيها ابتسمي بويها وخلي ذكراج عندها طيبه.. واذا ريلج ضايقج اهي شكو اتحملكم! مو ذنبها . وهل ترضين ان ولدج البزر اللي ربيتيه وشقيتي عليه تييج مرته عقب ما تكبرين وتعاملج مثل ما انتي تسوين؟ والا ترضين مرت اخوج تسوي بامج اللي تسوينه بخالتج؟

هذا ما يمنع ان اكو جناين اذهبه واذكر من المتزوجات اللي مرو علي وفعلا حبيت هالشي فيهم:

– وحده تسمي خالتها يمه بدال خالتي فعلا شي طيب ويبين تودد الجنه للخاله
– وحده (ساكنه عند حمولتها) بالدشه والطلعه تسلم على خالتها وتبوس راسها وتعلم عيالها يسلمون، علميا ثبت ان الملامسه تزيد الموده بين الاشخاص
– وحده بالدوام كل يوم الضحا تدق على خالتها تسال عنها واتشاورها بامور حتى لو اهي ما تحتاج مشاوره ومقرره وخالصه.
– وحده وبدون مناسبه تتنقص شي حق الخاله حتى لو كان بسيط ولي شافتها امدحتها (صايره اشحلوج خالتي، ماشاءالله ويهج منور خالتي)

– وحده تمدح خالتها عند الناس وحتى بحضور الخاله.

ياليت الجناين يتفننون بالتقرب من خالتهم لان محبة الام من محبة الولد وتاكدي كثر ما تحبين ام ريلج، ريلج بيحبج