(( حــوامل التوأم & أمهــات التوأم )) فيدونا و علمونا :)

راح اجاوبج كثر ما اقدر لانه حاسه فيج كنت نفسج مصدومه و متوتره و احاتي لي درجه قمت ابجي شلون بربي توأم

بالنسبه لي انا بتكلم عن تجارب الي مريته ويمكن تختلف من وحده لي وحده فيعني لا تحطيني انا مقياس بس يمكن في اشيا مشتركه و راح يبين مع الردود

بالاربعين وحده من بناتي كانت بجايه وثانيه تكسر الخاطر ساعات انساها ههههه وما اقولج تعب امبلا تعب وسهر بس اذا احد يساعدج يكون احسن
يعني انا امي كانت تاخذ وحده طبعا الهاديه ههههه وانا اخذ البجايه قلت لازم اروضها لما تصير اليفه

ومن المشاكل وحده من بناتي كانت فجاه تغص و تشرق بالحليب و يها يصير ازرق و تتشنج
كنت اركض فيها حق ابوي جني مينونه و وديناها الطبيب قالي الدكتورة لانه نتفه وصغير ما تعرف ترضع حتى لو طبيعي تشرق
خلوها تشرب حليب عن طريف انبوب من خشمها واااااي حبيبتي شكلها يكسر الخاطر

ومشاكل الثانيه العاديه الغازات والامساك و لانه ولادتي حزه الجو صفر انتشلووو وتاذيت لانه حرام ما يشربون حليب عدل من خشمهم المصكر

وبالنسبة حق تقسيم الوقت انام على نومتهم كثر ما اقدر و طبعا صعب اذا كان رضع تتحكمين بوقت نومهم يعني عادي وحده تقعد لج طول الليل والثانية نايمه يسوون لج شفتات ههههه بس انا خلاص قفلت وانهرت اعطي وحده حق الخدامه او ريلي وانام
و كنت احطهم بسرير واحد لانه سبحان الله يرتاحون لما ينامون يم بعض وهذا كلام دكاتره لما صارو اربع اشهر فصلتهم لانه اسمالله عليهم قامو يقلبون
وبالنسبه حق الرضاعه ترا صعب ترضعين طبيعي انا رضعت كثر ما اقدر بس لي اربع اشهر و قطعتهم استغفرلله حتى مرات انسى اغطي صدري اقول اكيد الثانيه الحين تبي ترضع حسيت اني بقرة الحلوووب هههههههه

والله بالنسبة حق الممرضه على حسب ظروفج اذا ما عندج احد يساعد امج او خالتج او خدامه زينه او اذا كانو صغار كلش وخدج ويبي لهم عنايه خاصه انا اعرف الي تطلب ممرضه غالبا علشان هالسبب
انا ياتني ممرضه يدتي كانت تدهنهم على بطنهم اطلع الغازات وتروح الامساك كانت صج شاطره وتريحهم

عقب الاربعين
اممممممممم حياة الزوجيه فووووووق تحت ههههههه يعني لما رجعت شقتي ريلي كان متوتر اكثر مني وشي طبيعي بالبدايه صعب تتاقلمين
بس بعدين لما تتعودين خصوصا شوي لما يكبرون وينتظم نومهم عادي ترجع حياتي طبيعيه واحلى بعد لا تحاتين يعني لا تتوقعين الاسوأ ولا الاحسن

بالنسبه حق البطن انا والده قيصري ومن قبل طبيعي الصراحه فرق الطبيعي بطنج بسرعه يرجع اما القيصري لا يبي له فترة وعاد انتي واهتمامج لازم تربطين بطنج اذا طبيعي من ثالث يوم واذا قيصري عقب عشر ايام ولا تاكلين وتكثرين اشيا الي تتفخ البطن و شربي كمون ونعناع زين يطلع الغازات ويخفف وشاي اخضر ونعناع بعد كل وجبه بنص ساعه

وطبعا بالنسبه حق السواد اشتغلي على نفسج بالخلطات قبل الاربعين و ان شالله يخف تدريجيا

الصدر اكيد يتغير مع الحمال والولادة سواء حامل بتوام ولا واحد

توامي لي سنة ونص معاي بالغرفه لانه كنت اتعب كالساعه اقوم من فراشي واطلع لهم لي غرفه الثانيه فكنت انومهم معاي اريح لي

وبالنسبه حق صحتهم لا حبيبتي مو دايما اذا حتى لو ولادة مبكره يمكن فترة معينه وبعدين يكبرون عادي حالهم حال اي طفل طبيعي
انا اعرف وحده ولدت نهايه السادس بس اول سنتين الي تعبو بس الحمدالله الحين اهم برابعه ابتدائي واطول من الي بعمرهم واذكيا وشطار الله يحفظهم