خلو الحريم اللي يبيعون دويات نفاس و خلونا نركز على العطارين

السلام عليكم ورحمة الله وبركاته ….

من زمان ما دخلت المنتدى الغالي كنت والده السنه اللي طافت ولاده مبكره

و لهيت حيل مع البنات و العيال و ابوهم و مشاغل الحياه الكثيره

حاليا عندي اختي بتولد شهر 12 و بديت ادور لها على دويات نفاس مضمونه و نظيفه

اللي تمدح ام محمد الشلاحي و حطيت عنها استفسار و اللي تقول ام فيصل و اللي تمدح ام محمد الرشيدي بالفردوس و اللي تمدح وحده بالجهرا ….

بس نسيت ان هالحريم ياخذون دوياتهم من اساس من الحواج او العطار

من اسئلتي و خبرتي المتواضعه في كذا مكان للدويات و معروفين … و ياريت اللي جربت من هالعطارين تقول تجربتها … لأن وبكل صراحه الحريم نهبونا نهيبه … و نبي نعرف كوعنا من بوعنا

يعني مو معقوله دوا الغوري او شاي الاعشاب تاخذينه من الحواج بدينارين تبيعه المره ب 10 !

خل نبدي بسم الله و اتمنى اتمنى اتمنى ان اللي تدخل الموضوع ترفعه بدعوه حلوه ان الله يهون على اختي ولادتها ….

حواج بوسعيد الفردوس :

كذا مره ادخل عنده القى حريم كبار يطلبون بالكيلوات منه دويات نفاس كالتالي :
مردود
لهوم
طبيخه و اهي مثل اللهوم ينحط مع العصيده و المرقوق والشوربه
دوا الغوري او طبيخة الغوري
دوا القهوه للهوا و الافرازات و تلقونه يحطها بعلبه صغيره
كبو الهوا
دوا التمره و عباره عن رشاد و حبه سوده و الحبه السوده تكون اقل من الرشاد

و انا جربت دوا الغوري عنه روووووعه و دوا القهوه حلووو بس انتي لازم تطحنينه

كل هالسوالف ما تتعدى ال14 او 15 دينار و المره تبيعه اقل شي ب 50
و اهو اصلا يقول كل الحريم ياخذون مني شغلهم جاهز!

يعني لو كانت تنقي و تخلط بالبيت قلت يمكن لها وصفتها الخاصه لكن تاخذه جاهز و بس اللي عليها انها تعبيهم بقوطي غير اللي متعبين فيهم .. ما نقول غير الشكوى لله

سمراء عدن شرق … ما عندي رقمها بس سايقي يدلها …:

الحسووو لا يعلى عليه من هالمطحنه
المردود
مستلزمات النفاس مثل قشر القهوه و غيره
عنده خلطات للهوم و هالسوالف الصراحه ما جربتهم

حواج الرحاب … هذا سمعت عنه من كذا وحده و بصراحه ما جربته
و ما ادري اي قطعه وياريت اي عضوه تعرفه تقولنا اهو اي قطعه و تلفونه

يمدحون اللهوم و المردود عنده

حواج الجليب ( صويلح ) …. يقولون معروف من عمر و الكل ياخذ منه الخلطات والحوايج للنفاس و الدوره اللي تعرف اي معلومات عنه بعد تقولنا و تنصحنا نبي رقمه لو سمحتووو
قريت عنه كذا مره بس ما عرفت القاه نبي الرقم و شنو تاخذون منه

بنات ….

بصراحه بصراحه … احنا حيل غشيمات بسوالف الدويات و ناكل و لا ندري شنو قاعدين ناكل
في بنات يقولون ان بعض الحريم تحط شغلات في دوياتها تعطي نتايج مؤقته مثل الصكفك و ما ادري شنو

و لهالسبب بعد فتره تدورين شي عندها للخراب او للهوا او الرخاوه

و اكيد اهي تكون معطيتج تلميحات ان لو فيج شي رجعيلي

ياريت البنات الحلوات اللي لهم خبره بالولادات و النفاس تنصحنا بكل صراحه
وتقول شنو اللي جربته و اللي ما جربته

و مشكورين و جزاكم الله خير و ربي يهون على كل وحده حامل