دياي بتتبيلة الصلصات المتنوعة مع العسل بالصور

السلام عليكم،،

أكيد وايد مجربين دياي بالفرن متبل بالصلصات وكل وحده لها طريقتها الخاصة، أنا الصراحة أحب أجرب ووايد أحب الصلصات فأشتري أنواع وأشكال، وهذي وحده من الطرق اللي أسويها على طول واللي ذاقوها عجبتهم، الطبق حلو مع عيش بالزعفران أو مع بطاط مقلي، من زمان مصوره وماصارت لي فرصة أنزل الموضوع.

الطريقة سهلة وسريعة بس تسوون التتبيلة وتدخلونها الفرن، ومرات أتبل الديايه من الليل وأخليها بالثلاجة وثاني يوم أدخلها الفرن أحلى تصير بعد،.

المقادير:
دياي
صلصات (راح أحط الصور)
فلفل أسود وملح
خل
مكعب ماجي
ثوم وزنجبيل
بصل
روب
عسل
ليمون
زعفران منقوع بالماي وماي الورد

الطريقة:

أول شي تيبون الصلصات التالية، وتحطون من كل صلصة ملعقة كبيرة أو أكثر حسب الرغبة:

صلصة Hp وصلصة اسمها ترياكي

صلصة باربكيو وصلصة Honey mustard

صلصة حمرا فيها حبيبات فلفل ماعرف اسمها طعمها حار حلو، وصلصة ستيك، ودبس الرمان

عسل ملعقة واحد كبيرة أو 2 حسب الرغبة

خل

ملعقتين من ماي الزعفران، خلطتي دايما زعفران+ ماي+ ماي ورد+ هيل مطحون

روب طاسه كاملة

عصير ليمونتين أو أكثر أنا أحبه حامض

بصل مفروم ناعم

ثوم مهروس مع مكعب ماجي وزنجبيل

يتبع،،