ديرو بالكم من التحاميل

مرحبا بنات
طبعا انا هني ما اقصد التحاميل الطبيه لأ بس في بنات يروحون حق حريم تدهنها و تعطيها تحاميل والمصيبه البعض منهم تشرط عليج انج تعطينها مبلغ حوالي 100-200 و اذا حملتي تعطينها بعد ؟؟؟
المهم بقولكم هالقصه عن وحده صارت لاختها طبعا القصه كانت باخر الثمانينات
هذ الله يسلمكم صار لها سنين تبي تحمل والله ماكتب لها والكل يدري انها تدور الحمل … قالت لها وحده انها تعرف وحده بشمال تقصد العراق كل من راح لها لاااازم يحمل ،،، المره مسكينه وقلبها طاير قالت لزوجها وقالها خلاص بالويك اند نروح ان شاء الله

هالمره هذي ماشاء الله عليها ايمانها بالله قوي ( صلت استخاره ) وعقبها بجم يوم راحو للي قالولها عنها … طبعا هالناس حالتهم ضعيفه وبيتهم مثل العشه على قولتهم ,,,, تقول دخلنا عليها و طارت فينا وقالت خلاص اعطيج ( تحــــــاميــــــــل) وياربت تحطينهم الحين وطول الطريج نامي على ظهرج وافقو الناس لحد الحين ماكو مشكله بس تقول اللي قرص قلبي طول ما احنا قاعدين تروح لغرفه يمها تطل عليها وترجع لنا واحنا ملينا الجو الحار وورانا طريج طويل وكل مره تقول الحين الحين صبرو شوي ماكو الا جم دقيقه وراحت يابت التحاميل تقول واحنل على نيتنا ماكو الا ثواني الا ولدها طالع من الغرفه عمره 14-16 ومعاه فوطه بيروح يغسل تقول اهيا تحاجيني بصوت عالي ماتبيني اشوف الولد و زوجها يقولها شفيها هذي صوتها عالي ؟؟
تقول ماكو طلعت منها وحذفت التحاميل من الدريشه
ويزفها زوجها طبعا ماقالت له ليش حذفتهم وردت عليه قالت اذا الله كاتبه بالحلال بيصير باذن الله مو بيد احد
طبعا ردت البيت المسكينه تبجي تقول لو الله ماحطه بعيني وحملت شلون اقابل رب العالمين ومسكينه راح العمره الشهر اللي بعده بس ماقدرت تكمل المسعى تقول احس ظهري انكسر بس خفت اقول لزوجي يقول كبرتي هههه وردت الفندق تقول ولا نازل عليها نقطتين دم حسبالها الدوره وقالت لزوجها اشوه تحللت عقب العمره و كملت عمرتي
تنطر الدوره تنزل وتنطر طبعا مانزلت لان الله كتب لها الحمل والله رزقها بولده

الفايده: كلنا نوصل مرحله نيئس فبها و نتحطم و تلعب فيها العواطف والضغوط من اللي حوالينا بس اهم شي عقلج وتفكيرج ما يتأثر باي شي واسئلي ونصيحه اذا تعالجون عند دكاتره لا تخربطون كل شهر عند دكتوره استمروا جم شهر اذا مافي نتيجه ريحو و كملو الشهر الثاني مع دكتوره غيره اذا مارتحتو للاول