ساعدوني ولكم الاجر

السلام عليكم بنات انا محتاره بامري وحبيت استفيد من تجاربكم يمكن تساهم بشفائي من بعد الله انا من سنتين صارت معاي اعراض دوخه وفقدان تركيز وترجيع مع ارهاق وتعب بالجسم وماتحمل الصوت العالي واشياء كثيره اعجز اني اوصفها وزادت علي هالاعراض وصارت تجيني بشكل يومي لحد ماعجزت اني اعيش حياتي طبيعيه وسويت تحاليل عند المستشفيات الخاصه والحكوميه وعرضت نفسي على افضل الدكاتره الي شخصو حالتي بانه التهاب في الاذن الوسطى وعطوني ادويه واخذت الادويه بنتظام وحالتي محلك سر مافي اي تحسن بالعكس احس انها زادت ورحت لاخصائي اذن وانف وحنجره وسوالي كل التحاليل وشفته واقف محتار مو عارف شنو يقول المهم تحاليلي كلها سليمه اخر شي فكرت اني اروح اسوي رقيه شرعيه وانصحتني وحده من رفيجاتي اني اشوف راسي يمكن فيه فري وفعلا افحصتلي زوجة المطوع الي بالمنقف واسمها ام محمد وقالت انه فيني فري كبير طوله سبع اصابع وحالتي حيل متاخره وحطتلي اول صبخه والله لا يوريكم العذاب الي شفته من بعد الصبخه صدااااااااااااااااااع مايتحمله حتى الجبل وترجيع متواصل لين اليوم الثاني وتعب وارهاق بشكل مو طبيعي واهلي يقولون اني كنت اهلوس واهذري بعبارات مو مفهومه هذا غير عيوني الي مو قادره افتحها من الالم ومرت علي ثلاث ايام كانها ثلاث قرون وشلت الصبخه وغسلت شعري ورحت لزوجة المطوع ام محمد وكان فيه على جبهتي من فوق زعرورتين كبااار وارمين ولونهم احمر وكانه احد فالعني بصخر ولما شافت الحرمه راسي استانست وقالت ماشاءالله هذي نعمه من الله شرج طلع يابنتي والورم هذا الي بجبهتج دليل على خروج الشر منج والمشكله اصرت انها تصبخلي صبخه ثانيه لانها تقول الصبخه الاولى سكرت ثلاث اصابع بس وباقي اربع اصابع وكلت امري لله وصبخت وماله داعي اقولكم الي شفته لانه شي فوق الوصف صدااااااااااااااع يوصل لمرحلة الجنون وتحملت ثلاث ايام ثانيه ورحت وشلت الرباط لقيت الورم الي باالجبهه زاد اكثر من قبل وفي زعروره صغيره براسي من ورا واكدتلي للمره المليون انها هذي علامات التماثل للشفاء وطلبت منها اني ارتاح جم يوم عشان اقدر انام واكل وارجع لها واللحين انتم يابنات عندكم فكره شامله عن مرضي وانا بحيره من امري لانه اختي اتصلت على اكثر من صباخه وكلهم اكدولها انه الصبخه ماطلع ورم وزعرورات بالراس ولا تسبب الالم العنيف الي انا احس فيه فا شرايكم ياخواتي الي سوته لي الحرمه صح ولا غلط الزعرورات طبيعيه ولا لا ؟ الالم العنيف الي احس فيه عادي ولا لا ؟اكمل عندها ولا اشوف غيرها ؟ لاني مو قادره على علاجها احس اني بمووت من العوار الله يجزاها خير كل وحده ترد علي بالتفصيل وتفيدني باي معلومه حتى لو كانت صغيره والله يجزاكم الجنه ولا تجرب اي وحده فيكم الي اجربه ناطره ردودكم وهذي صوره لراسي بعد الصبختين وتاركتلكم الحكم من بعد الله سبحانه وتاكدو اي وحده راح تعطيني معلومات تساهم بعلاجي راح ادعيلها بظهر الغيب