عمليه اللحميه عند الاطفال

الاول كان عمره سنه و8 شهور

وحبيبي الثاني توني مسويتها له عمره 11 شهر

سويتهم عند البروفيسور محمد الدماطي ماشاء الله عليه وهو مسوي حق بنت اخوي بعد

عيادته بكويت لندن كلنك رقم تلفونهم 22650606 وعنوانه : الكويت – حولي – شارع بيروت – خلف محطة البنزين – مقابل مجمع النقرة الجنوبي

اول شي لازم تحجزين موعد بالتلفون بعدين يشوف البيبي بالعيادة يفحصة ويفحص خشمه وأذونه يفحصهم بجهاز يقيس ضغط الاذن ويشوف اذا في ماي ورا الأذون او لأ لأن وايد حالات من مرضى اللحمية يكون متكون ماي ورى أذونهم بس أنا الحمدلله لاني كنت افطن على هالشغلة مبجر ما تكون ماي عند عيالي.

بعدين بيكتبلج أشعة لازم تسوينها – تروحين بنفس الوقت حق مستشفى دار الشفا لانها وايد قريبة من عيادته تسوين الأشعة وتاخذين النتيجة بنفس الوقت وترجعيله

يشوف نتيجة الأشعة ويقررلج اذا وضع البيبي تعبان بعني عنده التهابات ونشلة واحتقان فبلاعيمه بيعطيج كورس مضاد حيوي ويقولج رجعيلي عقب اسبوع لان ما ينفع يسويله عمليه وهو مريض دكتور التخدير ماراح يوافق لان نسبة كريات الدم البيضا بتكون مرتفعه بدمه لان مريض.

اذا وضعه اوكي ومو محتاج كورس المضاد الحيوي بيحددلج موعد للعملية على طول يا ثاني يوم يا ثالث يوم بس شرط تنزلين مختبر التحاليل بنفس العيادة تحت يسحبون منه دم عشان يتأكدون ان نسبة الدم اوكي

بيتصل فيج الدكتور بنفس اليوم وبيبلغج وبالعادة الدكتور يسوي عملياته بمستشفى الهادي

التكاليف : فتح ملف اول مرة + كشف الدكتور 40 دينار
الأشعة : مو ذاكرة والله
الدم : موذاكرة بالضبط بس مو وايد
المستشفى والعملية : 371 د.ك بين اتعاب الدكتور ونسبة المستشفى

يوم العملية لازم يكون الياهل صايم من قبل 10 ساعات من موعد العملية وتروحين المستشفى قبل موعد العملية بساعتين تراوينهم ورقة الدخول اللي معطيج ياها الدكتور وهم يسوون الاجراءات لان الدكتور اصلا حاجز ومكلمهم.

يا اما بييون يشربون الياهل شراب يخدره وينام او انهم بيدخلونه العمليات وهو صاحي وداخل راح يحطووله كمام تخدير

العملية نفسها ماتطول ربع ساعه والدكتور بالعادة يدق علي من داخل غرفة العمليات يقولي خلصت يا ام حيدر وتطمني شوي وحنطلع البيبي هو بالافاقة دلوأتي

طبعا أم حيدر تكون في عالم آخر من الدموع والبجي

العملية عنطريق منظار ليزر يسسونها عن طريق الفم .

شوي وتاخذين الياهل وتصعدين الغرفة بيكون نايم بي يون شوي يقعد وينام وما يصير تعطينه اكل او شرب الا عقب 4 ساعات من العملية عشان لا يرجع من البنج

خلال هالوقت راح يبدى يصحصح وعقب 4 ساعات بيطلبون منج تشربين شوي عصير او ماي عشان يتطمنون ان اوكي وتطلعون يالسلامة من المستشفى على طول
بدوووووووون مبالغة اهو بس يوم العملية بتحسين الياهل ماله خلق لان حبيبي من مكان العملية متأذي حاولي توكلينه روب شوربة اكل خفيف ومهروس
ثاني يوم بحيل الله تشوفينه صحصح

بس ها اول اسبوعين او 3 اسابيع من العملية تقريبا ماراح يفرق عليج وبتحسين ان الشخير زاد ما نقص هذا امر طبيييييييييييييييعي لان مكان العملية وارم عنده اولا ولان الياهل صارت عنده عادة ان يتنفس من حلجه ثانيا فعلى ما يبدى ينسى هالعادة

وعقب انشالله تشوفين الياهل شلون ترد عافيته ويتعدل مزاجه وياكل ويلعب وتخف عصبيته والف حمد وشكر اللي الطب تقدم وصارت هالعملية سهلة

اتمنى اكون فدتج وسلامات وطمنيني وتعبت ونشف ريجي لوووووووووووووووووووووول

وولدي سويتها قبل العام هم كان عمره 4 سنوات بس سويتها بلندن لأنه حالته غير