عندما تكون الخادمة هي الزوجة الخفية !!!

والله كلامج صج بتبوتا

والله انا الحمدالله الوالده ما علمتنا على جذي, مع انه طول عمرنا على الاقل يكون خدامتين عندنا, بس لا يمكن تخلي الخدم ترتب اغراضنا الشخصيه, اوكي تنظف لنا الغرف بس ما يفتحون ولا درج ولا كبت, اغراضنا احنا نسويها ونعدلها حتا ملابسنا, كل واحد مسئول عن روحه بنت او ولد, يعني لايمكن الخدامه تيي وتجيس اي شي من اغراض ابوي, قبل كنت اتضايق من امي انها جذي تسوي اقول شنو احنا خدم نشتغل واهما قاعدين؟؟ بس والله ما عرفت معنى اللي تسويه الا لما كبرت, وعمرها ما خلت خادم يغسلنا وحنا صغار والا يوكلنا والا يبدلنا, هذي مسئوليتها اهيا, اهيا امنا والحمدالله ما قصرت معانا, مع انها موظفه يعني مو ربت بيت و ما عندها شغل. عشان جذي عمرنا لا انا ولا خواني صار عندنا ولاء حق خدمنا مثل ما نشوف هالايام اليهال يقطون اعمارهم على الخدم والا بعضهم يبي الخدامه و مايبون امهم والا الياهل يكتئب اذا غيروا خدامته!!

واتمنى انه الله يقدرني اني اربي عيالي اذا الله رزقني مثل ما امي ربتنا, و انشاءالله الكل يحاول يسوي جذي

ومشكوره يا الغاليه على هالموضوع

انا موظفه واطبخ واساعد الخدامه بكل شي لأن عندي يهال بعد ثلاث بسم الله عليهم وحامل بالرابع بس غرفت نومي وترتيب كبت ريلي طبعا انا والطباخ انا بس ريلي المصيبه الكبري اللي بس يسولف مع الخدامه ملوع جبدي وايد يعطيها وجه يعني مثلا مره قالت لي: ان بيت خالت ريلي موجودين عند ام ريلي قلت لها : اشدراج واش عرفج فيهم قالت لي : بابا قال لي هذيل منو ؟ طبعا الحراره ارتفعت وسألته :ليش تسولف مع الخدامه وتعطيها وجه قال لي: اهي سألتني ، قلت له: حتي لو تسإلك المفروض تقول لها هذا مو شغلج وعيب 0

والمصيبه الثانيه عنده دوانيه وانا دايما ازهب له كل شي بنفسي ما أشوف إلا الخدامه يايتني وتقول لي: ماما اشلون اسوي القهوه؟ قلت لها : ليش؟ قالت : بابا يقول زهبيلي القهوه والشاي حق الدوانيه الليله0 هذا بيذبحني بعد ما قال لها قولي حق ماما تسوي لا ،قال لها انتي سوي القهوه والشاي ، ولما سألته : شالسالفه مو انا ربت البيت والخدامه من متي تزهبلك الأغراض قال لي: شفيها شفت الخدامه بالحوش وانا طالع وقلت لها شنو المشكله0 اتصدقون وعلى فكره الخدامه القديمه ما كان يعطيها وجه ليش عيوزه ودايما اذا يبي شي منها يقول : كلمي خدامتج خل تسوي مثلا هذا الشي حتي لو الخدامه واقفه يمه ما يكلمها ؟ شنو السالفه ما أدري قلت له: تري اذا ما يزت من هالسوالف بودي الخدامه المكتب قال لي: ايه تبين اتييبين عيوزه صح (انزين اهو شكو عيوزه ولا صغيره) اشرايكم بنات ابليز ردوا علي

الحمدلله عمرنا ماعتمدنا عالخدم إلا اللحين لانه الوالده مريضه وفوق هذا مانخليها اتسوين اغراضنا ولا تدش غرفه الوالده ولا طباخ

استغرب من اللي مايدرون عن ريايييلهم واعيالهم وبيتهم شيء كله عالخدم يارب لايبلانا

ولا سافرت الخدامه تلقين البيت كله يضيع ومايعرفون يتصرفون واليهال متعلقين فيها

تشكرات