تخطى إلى المحتوى
الرئيسية » ليش الريال يجذب ؟؟ مشكلة مصيريه اقروها وعطونا الحل

ليش الريال يجذب ؟؟ مشكلة مصيريه اقروها وعطونا الحل

بسم الله الرحمان الرحيمو الصلاة و السلام على أشرف المرسليننبينا محمد صلى الله عليه وسلم

السلام عليكم

شلووونكم كويتيات ومو كويتيات عساكم بخير

تقبل الله طاعتكم

وعيدكم مبارك مقدما

مادري من وين ابدي لاني مو صاحبة المشكله ومااقدر اوصلكم المشكله مثلها .. بس بحاول افهمكم الموضوع واتمنى منكم تعطوني الحل ..

بنت عمتي قبل سنة حبت واحد واهو حبها والحمدلله علاقتهم كانت جدا محترمه واهي ماتخش عن امها شي .. لا مواعد بينهم وحتى تلفونات مافي .. واذا بغو يكلمون بعض يشبكون او بالمسجات ..

عقب سنة من الحب المتبادل قرر انه يتزوجها واهي كانت موافقه بس الصدمه كانت ! انه اعترفلها انه شيعي ..

واهي مذهبها سني واهلنا مااعتقد بيرظون على مذهب مختلف عن مذهبنا ..

المهم اهي انصدمت وتهاوشتمعاه وهدته فتره .. بس لما اعترفلها بمذهبه قالها انه صارله فتره متسنن .. هالحجي طبعا من 5 شهور ..

واخته كلمت البنت .. واهو كان يحاول فيها ان اهله اييون بيتهم ويتقدملها بس اهي كانت خايفه انه يرد على مذهبه .. او اهلها يرفظون ..

مرت الشهور الريال دش جمعيه الاصلاح وبدى يتمسك بالمذهب اليديد ويرتاح فيه ..

واهي ردتله وتمسكت فيه بس هم كانت خايفه .. وبينتله وقالتله اذا شافت منه جذبه بعد او خش عنها شي .. بيكون اخر يوم بينهم .. وعطاها وعد مايجذب بشي ..

يحبها وااايد لدرجه تمنيت احصل واحد مثله .. مو مقصر بشي ينطرها بس تأشر وتقول ابي .. وطبعا اهي ولامره طلبت منه شي .. وعشانه قالها دوانيه مااروح سفر بروحي مااروح اهد الدنيا عشانج .. قالها مابي شي بس ابيج حتى حلالي كله بيكون باسمج !!

قبل جم يوم اهي بغت تعرف عنوان بيتهم عشان ادزله ورد من النت بمناسبة العيد ..

دزتله مسج سألته عن العنوان ..

سألها ليش وماليش مابغت تقول بس اخر شي قالتها : بغيت ادزلك ورد وانت خربت كل شي !

قالها مشكورة وماقصرتي ومو الا ادزين وكافي انج ذاكرتني ومن هالحجي .. المهم اللي فهمته اهي ان اهو ردها وشكله كان خايف ..

قبل يومين قالت حق امها يمه مري يم بيتهم !!

اهو من قبل قالها ان بيتهم لونه بني ..

انصدمت البنت ان امها تقولها لون بيتهم ابيض @@

هني حست ان اهو خاش شي عنها ..

واجهته قبل يومين اول شي انكر وحالته حاله وقالها بصورلج البيت ويمكن امج مظيعه !!

بس اهي ماجذبت عين امها ودرت انه جذب بس اللي صدمها ان ليش يجذب !!! شنو الفايده وهو شي سخيف وماله معنى !!

قالتله بهدك وانت ماتستاهلني انا طوفت اول جذبة بس هذي مااقدر اطوفها

اهو هني انهار وحالته حاله ويبجي ويترجاها ماتهده قالها ميخالف ارتاحي جم يوم .. عقبها كلميني بس لاتهديني خصوصا ان اهو متفق معاها ثالث يوم العيد يتقدمون لها ..

ف قالها ليش تهدمين سنه كامله بينا ومابقى شي واخذج لاتحرميني منج ادري اني غلطان وغبي ومادري ليش جذبت بهالشي بس سامحيني

طبعا بنت عمتي منهاره حده وماتدري شتسوي بس قالتله خلني بحالي ..

صارله يومين يدز لها مسجات ماترد عليه وقلبها مكسور واااايد وماتدري شتسوي ..

اهي ممكن تشك بكل شي الا حبه لها .. وايد يحبها وايد شاريها وزين معاها وحترم بس ليش يجذب ماتدري!!

ومالقت غيري تقوله وانا لما سمعت السالفه احترت اكثر منها !!

مره تفكر انها تهده
ومره تقول على الاقل احسن من غيره وكل ريال له عيوب وممكن بيوم يتعدل .. اهم شي ماايخونها ولاعنده خرابيط .. وهم تفكر تقول سنه مع بعض وتموت عليه شلون بلحظه يهدون بعظ ومابقى الا جم يوم على خطبتهم !

انا محتاره ومادري شرد عليها لاني مره افكر اقول تهده احسن ومره افكر اقول على الاقل عارفه عيوبه ولاتاخذ واحد يطلع فيه الف عيب ..

ساعدونا بنات لاني هم انا نفسيتي تعبت عليها اهي مثل اختي واكثر

نبي الحل منكم وبليز لاادشون الموظوع وتطلعون نبي حل ..

مشكورين

الوسوم:

14 أفكار بشأن “ليش الريال يجذب ؟؟ مشكلة مصيريه اقروها وعطونا الحل”

  6. hanan
    الرد
    انا في وجهة نظري انه لو كان شيعي و ما تسسن و انه هو جذاب ترى عادي يعين هي بتاخذ مسلم و بعدين شفيهم شباب الشيعه ترى مصلين و مسمين و يخافون الله حالهم حال كل شباب السنه يعني ما فيها اشكال بس مسألة الجذب من البدايه هي المسأله إلي مو حلوه و جذبه بالمره الثنيه ما ادري انا عن نفسي ما احب الريال الجذاب لأنه الجذب يهز شخصيت الرجل انا اقول ختخلي اهله يتقدمون و تتأكد من معلوماته من أهله و انشاله مافي |إلا الخير بس لاتفكر في اختلاف المذهب ترى هذا تفكير ماله داعي ماله اساس كلنه مسلمين و عيب نقول سني و شيعي بس نقول مسلمين و مافي فرق بين الأثنين

  7. khouloud
    الرد
    شالقصه هذي المفروض يحطونها قناة الوطن عقب مسلسل الوزيره هذا الولد بالضبط نفس نواف الر اشد اللي قال حق لمياء طارق بخطبج وابوي عنده حلال وانا ولد فلان وبيتنا بهالمكان
    قوليلها تشوف المسلسل علشان تعرف اشبيصير لها

    بعدين اشهالأم اللي اتخلي بنتها ترتبط بواحد مسجات وتليفونونات وتروح اتدور بيتهم بعد

    وبعدين هذا من راسه الى ساسه جذاب وعفلنجي خليها تهده وتشتري كرامتها

    وسالفه شيعي وتسنن هذي مالها شغل لان حتى لو تسنن على قولته عمام اعيالها شيعه
    ما اقصد بالسالفه تفرقه عنصريه او اي شي مو زين لا سمح الله
    بس علشان اسلوب التفاهم والتعامل والعادات ما يختلف عليها وما يتشتتون عيالها باجر

    الحين الناس من نفس المذهب مو كلهم ياخذون بعض هالنوب مذاهب مختلفه؟

    بعدين اهي ما اتعرف اسمه واسم عايلته؟ من الاسم يبين منو جدامج

    اقولج قصه الوزيره هذي بس بحلقات غير
    على قولة لمياء طارق ورني بطاقتك المدنيه( ما تدري ان التزوير ابيزه)

    قوليلها هديه هديه
    وغيري رقمج وايميلج

    الله يهدي امها بس

  8. chahinez
    الرد
    حبيبتي انا بسألج عن شغله

    اهو يوم يقولها عن بيتهم ولونه قبل لا يحلف لها ان ما راح يجذب عليها والا عقب

    ليش ان يمكن اذا كان قايلها من البدايه يمكن حط في باله انها علاقه عابره وما حب يدليها على بيتهم

    قال اخاف باجر تورطني بمشاكل !!

    بس اذا كان مجذب عليها بسالفه البيت عقب ما تأكد من حبها وحبه لها

    وان يبي ياخذها وعقب ما حلف لها ان ما راح يجذب

    اهني اكييييد في ان واخواتها بالسالفه

    تاكدي حبووبه منه بنت عمتج وساليها متى قالها ليش ان وايد شباب يجذبون في بدايه العلاقات يخافوون من البنات ومشاكلهم

  9. salima
    الرد
    اول شي شي يقهر يعني
    بنت عمتج شنو تبي اكثر من انه هو شاريها ويحبها وهي اشعليها بمذهبه اهم شي انه يحبها ويريحهاا
    وهي بعد شكو بلون بيتهم
    امبيه لا الصراحه هذي مو جذبه يعني قويه

    والله الهادي

  10. chahinez
    الرد
    هلا بنات..

    اول شي مشكورين وماقصرتو على الرد ..

    بالنسبة للي قالت ان بنت عمتي ماعندها سالفه ومافيها شي المذه … اهو اكيد كلنا مسلمين بس شي طبيعي خلينا واقعيين كل شي يختلف من ناحيه العقائد والفرائظ وكل شي ..

    وانا اتوقع فيه مرض جذب او شي
    ..

    بس والله صج صج يحبها الدليل اخته كلمت امها .. واهو للحين مصر ان ثالث يوم عيد يتقدمون لها

    بس مادري احس في تناقض بالموظوع !

    بس بنات للحين ماعطيتونا الحل ..

    تهده ؟؟

    والا تصبر عليه وتعطيه فرصه ويمكن يتعدل ؟ خصوصا ان مابقى شي ويتقدم لها ؟

  12. kouka
    الرد
    الحل ان شاء الله عند رب العالمين …………. اولا وثانيا وثالثا ووووووو صلاة الاستخاااااااااااااااااااااارة الرسول صلى الله عليه وسلم والصحابة كانوا يستخيرون على اصغر الامور فمابالج زواج

    اهي خل تصلي وتصلي وتوكل الموضوع لرب العالمين اذا يو واخطبوا وكل شي مشى تمام

    اتيي الخطوة الثانية وهي ان اهلها بيسألون ودام اهي في صراحة بينها وبين امها خل تقولها عن الجذب عشان هم اهلها يتحققون من هالموضوع يعني ربعة جيرانهم…….الخ يسألون الريايل هالسؤال بالتحديد عرفتوا عنة انه ريال جذاب ؟؟؟ بالدوام زملائة اكييد اذا اهو بو شلاخ يعرفون

    اذا طلع لكم ان الريال مو من عوايدة الجذب اهني ممكن توافق بسسسسسسسسسس

    يطلع سؤال مهم ليش حاول يضيعها عن بيتهم؟؟؟

    تقول لامها ان اذا يه يخطبها بتكلمة وتسأله عن اشياء (((( وطول هالمدة لاتكلمة ماله داعي لاتصير سهلة وانا ما ائيد هالتلفونات او حتى هالمسجات)))) عالعموم اذا يه يخطبها تقوله شنو الي الي كنت بتخشة بتغيير لون البيت؟ او انك تضيعني عن بيتكم؟؟ وخل تقوله اكييد لك مقصد واذا ماقلت لي شنو هالشي ترى اهلي بيسألون عن بيتكم كلة فماكو فرق اذا خشيت او لا فتطلع منك افضل

    وبعد الاستخارة والسؤال عنة وانها تسأله بموضع جد مثل وضع ان ياب اهلة عندهم مو بالتلفون يرقع لها تقدر تحدد توافق او لا

    يعني لا تقررون الحين خلاص مابيه

    او خلاص بعديها له وبوافق خلوا كل شي يمشي خطوة خطوة

    لان صعب وغلط انكم تحددون الحين ولا احد فينا ممكن يجاوبج او يعطيج الحل توافق والا لا

    والله يسهل لها

  13. amira
    الرد
    مممم شوفي اختي انا من رايي اول شي تستخير ويخطبون واهلها ياخذون الطريقه التقليديه اذا الولد زين ومعروف عنه ان خوش ريال ليش لا واذا اهو طلع موزين ومهزوز نفسيا لا شحقه تاخذه ايها نصيبها الي احسن منه بس خل تدقق بانهم يسالون بشخصيته لان ريال يبجي ويترجي مم في تحتها خطوط واهي اصلا ماتعرفه عدل المسجات والمسنجر ترا ماتعلمج شنو صج شخصيه الريال ولون بيتهم مو مقياس انه جذاب ولا صادق يمكن اول ماتعرفت عليه ماكان واثق فيها ولا ماكان يبيها تعرفه وعقب تغيرت مشاعره تجاها اهم شي ان يسالون عنه بشغله في منطقته الاماكن الي يتردد عليها والله يتمم لها بخير اذا زين ويرده عنها اذا موزين حقها

  14. kamiliya
    الرد
    آنا من رايي تقرون كتاب " لماذا يكذب الرجل … وتبكي المرأه "

    ترى اتكلم جد … الريال طبعه الجذب … ما أعتقد انه ما في ريال مايجذب … و خصوصا العلاقات اللي تكون بالتلفون او المسنجر … على قولتهم … البنت تخش عنه اشياء في حياتها و هو بعد … و موضوع بيتهم اللي جذب فيه … انا من رايي لاتدقق فيه معاه و اي شي تشك فيه خل تقصى فيه من نفسها و هي تشوف هل في شي خاشه عنها يسوى و لا تعطي طاف و لاتقعد تسأله جنه متهم … و مثل ما قالو البنات خل يتقدملها و أهلها يسألون عنه و تدرس الموضوع عدل و تستخير و الله يكتب لها الخير ان شاء الله.

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

هذا الموقع يستخدم Akismet للحدّ من التعليقات المزعجة والغير مرغوبة. تعرّف على كيفية معالجة بيانات تعليقك.