بنات انا منحرجه وايد والي بتساعدني الله يوفقها أبي طريقة عيش البرياني

هلا حبيبتي
عادي التجارب بالطبخ اتعلمج،،لا تحاتين ولا تنحرجين
وفي كذا موضوع عن البرياني بالقسم راح يفيدونج
والعيش يصير لونه اصفر اذا عقب ما تفوحينه ثلاث ارباع فوح تشخلينه بمشخال و تصبين عليه الآتي:
نص قلاص ماي ورد تنقعين فيه شوية زعفران وشوية هيل ناعم وشوية صبغ العيش اللي علبته حمرا
وتوزيع ماي الورد والزعفران على العيش يكون بملعقه وعلى حسب رغبتج في اشكثر تبين يكون الصفار بالعيش.
وغالبا البرياني يكون طبقات..طبقه خلطة اللحم او الدجاج وبعدين فوقه كميه من العيش وترشين عليها من ماي الورد والزعفران وشوية بقدونس وكزبره ونعناع مفرومين ..وهكذا نستمر بالطبقات ..واذا وصلنا للوجه نرش ماي الورد والزعفران على وجه الجدر.
والبهارات ..البهارات العاديه الحب مثل الدارسين والمسمار والهيل وورق الغار..وتضيفين عليهم بهارات مشكله ناعمه اللي بالعلبه الخضرا ومتوفره بكل الجمعيات.
عساني اكون قدرت افيدج حبيبتي…

حبيبتي عشان العيش يصير اصفر بالبرياني في صبغه عند البهارات اسنها صبغه البرياني في ناس يحطونها وفي ناس يحطون بهارات ورشه كركم بكلتا الحالتين يصير اصفر

والزعفران ياقلبي ييبي ماي ورد واذا ماعندج عادي الماي العادي
وحطي شويه من الزعفران وخليه فتره لين الماي يصير لونه حلو يعني يبيله ربع ساعه على الاقل تنقعينه او اكثر

والدياي اول شي فوحيه مع طبعا بصل مقطع وكركم وملح وناس يحطون هيل ومسمار عرفتي الخلطة هذي تيي مشكله صوب البهارات فيها هيل ومسمار ودارسين عقب ماتفوحينه ويستوي تكونين مقصصه بطاط وتقلين البطاط اول شي والبصل وجزر وطماط فلفل اخضر وحطي الدياي فوقهم وحطي بهاراتج وخليهم مع بعض شويه 5 دقايق وتالي انتي طبعا زهبتي العيش تحطين اول شي شويه دهن بالجدر وعقب نص كميه العيش وتالي تحطين خلطة الدياي وعقب تحطين باقي الكميه مالت العيش وترشين فوقه ماي الزعفران بالملاس افضل عشان يتوزع وخففي النار حده وخلي العيش يتسكر

الله يجزاكم خيييييييييييييير يارب

ماقصرتو على الرد وصج صج استفدت وان شاءالله يطلع طبخي حلو يارب

ماشاء الله البنات ما قصروا

وشوفي هالمواضيع راح تفيدج

http://q8yat.net/showthread.php?t=41…D1%ED%C7%E4%ED

http://q8yat.net/showthread.php?t=43…D1%ED%C7%E4%ED

http://q8yat.net/showthread.php?t=42…D1%ED%C7%E4%ED

http://q8yat.net/showthread.php?t=43…D1%ED%C7%E4%ED

http://q8yat.net/showthread.php?t=40…D1%ED%C7%E4%ED

http://q8yat.net/showthread.php?t=37…D1%ED%C7%E4%ED

http://q8yat.net/showthread.php?t=30…D1%ED%C7%E4%ED

http://q8yat.net/showthread.php?t=36…D1%ED%C7%E4%ED

http://q8yat.net/showthread.php?t=26…D1%ED%C7%E4%ED